Otabek Umarov Toshkentda Telegram asoschisi Pavel Durov bilan uchrashdi

^{Foto: Telegram / Otabek Umarov}
Markaziy Osiyo MMA Konfederatsiyasi prezidenti Otabek Umarov Toshkentda Telegram messenjeri asoschisi Pavel Durov bilan uchrashdi. Bu haqda u oʻzining Telegram kanali orqali ma'lum qildi.

Telegram jamoasi loyiha asoschisi Pavel Durov va uning akasi Nikolay ayni kunlarda Oʻzbekistonda.

"Telegram biz uchun shunchaki birinchi raqamli messenjerdan kattaroq narsadir. Biz uning yordamida yaqinlarimiz bilan doim aloqada boʻlish bilan birga, yangiliklardan xabardor boʻlamiz, ishlarni yuritamiz, kerakli tovar va xizmatlarni topamiz. Telegram har qanday masalada mobil internetning deyarli har bir foydalanuvchisiga yordam beradi", — deb yozadi Otabek Umarov.

Markaziy Osiyo MMA Konfederatsiyasi prezidenti Umarov Pavel va uning yaqinlarini mehmondoʻst Oʻzbekiston zaminida qabul qilish haqiqiy sharafga aylanganini ta'kidladi.

"Ularning barchasi yuksak darajadagi oʻz ishining ustalari boʻlibgina qolmay, balki dunyoga qalbi ochiq boʻlgan ajoyib insonlar ekaniga shaxsan ishonch hosil qilish — benihoya yoqimli hissiyotdir. Umid qilamizki, Toshkent, Buxoro va Samarqand shaharlari qoldirgan taassurotlar hamda Telegram foydalanuvchilari bilan muloqot ularga yangi texnologik echimlarni yaratishga ilhom beradi. Bunga juda oz fursat qolganiga ishonaman”, — deya qayd etadi Otabek Umarov.

Iyun boshlarida Telegram asoschisi Pavel Durov yozni Markaziy Osiyoda oʻtkazishini e'lon qilgandi.

Keyinroq Telegram asoschisi Pavel Durov Qirgʻizistonga tashrifi aks etgan suratlar va safar taassurotlarini oʻz muxlislari bilan boʻlishgan edi.

Durov mamlakat haqida nihoyatda iliq fikrlarini bildirgan, Qirgʻiziston togʻlari yaqinida otda uyushtirgan sayohatini mamnuniyat bilan eslab oʻtgandi. “Zamin” yangiliklarini “Telegram”da kuzatib boring