O‘zbekistonda yangi o‘quv yili 4 sentyabrdan boshlanadi

O‘zbekistonliklar Mustaqillik bayrami munosabati bilan ketma-ket 3 kun dam oladi.

Qo‘shimcha dam olish kunlari 2024 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risidagi prezident farmonida belgilangan.

Unga ko‘ra, 3 sentyabr, seshanba ish haftasining turidan qat’i nazar, barcha xodimlar uchun qo‘shimcha dam olish kuni etib belgilangan. Mehnat kodeksining 208-moddasiga muvofiq ishlanmaydigan bayram kunlari hisoblanuvchi 1 sentyabr — O‘zbekiston mustaqilligi kuni 2024 yilda yakshanba — dam olish kunlariga to‘g‘ri kelishi munosabati bilan ushbu dam olish kuni 2 sentyabr, dushanba kuniga ko‘chiriladi.

Shunday qilib, o‘zbekistonliklar Mustaqillik bayrami munosabati bilan ketma-ket 3 kun dam oladi. 2024/2025-o‘quv yili 4 sentyabrdan boshlanadi.

31 avgust, shanba kuni olti kunlik ish haftasida ishlaydigan xodimlar ishdan 1 soat vaqtli ketishi mumkin. Chunki Mehnat kodeksining 187-moddasiga binoan ishlanmaydigan bayram kunlari arafasida har kunlik ishning davomiyligi barcha xodimlar uchun kamida 1 soatga qisqartiriladi. “Zamin”ni Telegramʻda oʻqing!