O‘zbekiston aholisi qaysi kasalliklardan ko‘proq vafot etayotgani ma’lum qilindi

Mamlakatda 9 oy davomida qayd etilgan o‘limlarning 57,2 foizi qon aylanish tizimi kasalliklaridan kelib chiqqan. Bu haqda Statistika agentligi ma’lum qildi.

^{Infografika: Statistika agentligi}
O‘zbekistonda 2024 yil yanvar–sentyabr oylarida vafot etganlar soni 131,7 ming kishini tashkil etdi. Shundan erkaklar 72,3 ming nafar, ayollar 59,4 ming nafar. Vafot etganlardan 74,5 ming kishi shaharlarda, 57,2 ming kishi qishloqlarda yashagan.

Mamlakatda har 100 ming aholiga jami vafot etgan erkaklar soni 517,6 nafar, ayollar esa 430,5 nafarga to‘g‘ri kelgan.

Agentlikning qayd etishicha, to‘qqiz oy mobaynidagi o‘lim holatlarining 57,2 foizi qon aylanish tizimi kasalliklaridan, 9,5 foizi o‘simtalardan kelib chiqqan.

Shu bilan birga, vafot etganlarning 6,5 foizida nafas olish a’zolari kasalliklari qayd etilgan. Qolgan 5,8 foiz marhum baxtsiz hodisa, zaharlanish va jarohatlanishlardan, 4 foizi ovqat hazm qilish a’zolari kasalliklaridan, 1,2 foizi yuqumli va parazitar kasalliklardan, 15,8 foizi boshqa kasalliklardan vafot yetgan.

Taqqoslash uchun, 2023 yilning yanvar–sentyabr oylarida O‘zbekistonda 129,7 ming kishi olamdan o‘tgan. O‘lim holatining 58,9 foizi qon aylanish tizimi kasalliklaridan kelib chiqqani ma’lum qilingan.

Yangiliklar