Qoraqalpog‘iston Respublikasida muhim kadr o‘zgarishi amalga oshirildi. Shohrux Azamatovich Aminov mazkur hududning bosh prokurori lavozimiga tayinlandi. Bu haqda Qoraqalpog‘iston Respublikasi Jo‘qorg‘i Kengesining navbatdan tashqari o‘tkazilgan oltinchi sessiyasida rasman e’lon qilindi.
Yangi prokuror 1981 yilda dunyoga kelgan bo‘lib, oliy yuridik ma’lumotga ega. U 2002 yilda Samarqand davlat universitetini huquqshunoslik yo‘nalishi bo‘yicha muvaffaqiyatli tamomlagan. Prokuratura organlaridagi mehnat faoliyatini 2004 yilda Samarqand shahar prokuraturasida boshlab, keyinchalik Samarqand viloyati prokuraturasining turli bo‘limlarida mas’uliyatli vazifalarni bajargan.
2014 yildan boshlab Bosh prokuratura tizimida faoliyat yuritib, boshqarma prokurori, katta prokuror, boshqarma rahbarining o‘rinbosari va boshqarma boshlig‘i lavozimlarida xizmat qilgan. Shuningdek, u Toshkent viloyati prokurorining o‘rinbosari, Bosh prokuratura huzuridagi Majburiy ijro byurosi direktori o‘rinbosari kabi muhim lavozimlarda ham ishlagan.
2018-2020 yillarda Navoiy viloyati prokurori bo‘lgan Shohrux Aminov, 2020 yil noyabrida Sirdaryo viloyati prokurori sifatida faoliyat yuritgan. 2022 yil aprelidan esa O‘zbekiston Respublikasi bosh prokurorining o‘rinbosari sifatida ishlab kelayotgan edi.
Ma’lumot uchun, Qoraqalpog‘iston Respublikasida prokuror lavozimini 2022 yil iyulidan beri Erkaboy Tojiyev egallab kelayotgan edi. Uning keyingi faoliyati haqida hozircha rasmiy ma’lumot berilmagan.
