Surxondaryo viloyatida maktabda sodir bo‘lgan mojaro jamoatchilik e’tiboriga tushdi. Ijtimoiy tarmoqlarda tarqalgan videolarda Boysun tumanidagi o‘qituvchi 2-sinf o‘quvchisini urib, uning yelkasini sindirgani aytilayotgani ko‘rilgan. Bu haqda viloyat Maktabgacha va maktab ta’limi boshqarmasi xabar berdi.
Tarmoqdagi videolarga ko‘ra, o‘qituvchi Y.H. ismli pedagog 2-sinfda tahsil oluvchi S.J. (o‘g‘il bola)ni maktabga futbolka kiyib kelgani uchun jazolagan. O‘qituvchi u bolani urib, natijada uning yelkasi singan. Bolaning onasi bu holatdan so‘ng mutasaddilarga murojaat qilgan, biroq aytilganidek, yetarli javobni ololmagan.
Viloyat Maktabgacha va maktab ta’limi boshqarmasi bu holat yuzasidan rasmiy bayonot berdi. Xabarda ta’kidlanishicha, voqea hozirda nazoratga olingan va tegishli tashkilotlar bilan hamkorlikda barcha tafsilotlar o‘rganilmoqda. “Barcha bolalarning huquqlari, sha’ni va qadr-qimmati daxlsiz hisoblanadi. Boshqarma faoliyatida bu tamoyil doimiy ustuvor yo‘nalish sifatida belgilangan”, — deyiladi rasmiy ma’lumotda.
Shu bilan birga, hozirda Boysun tumani hokimligi, huquqni muhofaza qilish organlari va ta’lim tizimi xodimlari ishtirokida voqea sabablari o‘rganilmoqda. Bolaning sog‘lig‘i shifokorlar nazoratida, oilaga zarur tibbiy yordam ko‘rsatilmoqda.
Jamoatchilikda bu holat keng muhokamalarga sabab bo‘ldi. Ko‘plab foydalanuvchilar ta’lim tizimida bolalarga nisbatan zo‘ravonlik holatlariga mutlaqo yo‘l qo‘yilmasligi kerakligini ta’kidlamoqda.
Ta’lim muassasalarida bolalarning xavfsizligi va insoniy munosabat muhiti ta’minlanishi zarurligi haqida mutaxassislar yana bir bor eslatmoqda. Ular ta’lim tizimida tarbiya jarayoni nafaqat bilim berish, balki bola shaxsini hurmat qilishga asoslanishi lozimligini ta’kidlamoqda.
“Zamin”ni Telegramʻda oʻqing!
