Xorazm viloyatida noqonuniy qurilish bo‘yicha yana bir holatga chek qo‘yildi. Majburiy ijro byurosi ma’lumotlariga ko‘ra, Urganch tumanida fuqaro o‘zboshimchalik bilan yer maydonini egallab, ruxsatsiz uy qurib olgan. Sud qaroriga binoan, mazkur uy majburiy ravishda buzildi.
Ma’lum bo‘lishicha, Urganch tumani, G‘oybu qishlog‘i hududida joylashgan “Cho‘lobod” mahallasida yashovchi javobgar M. Atajanova 640 kvadrat metr yer maydonini qonuniy hujjatlarsiz egallab olgan va o‘sha joyda qurilish ishlarini amalga oshirgan. Sud tomonidan chiqarilgan ijro varaqasiga ko‘ra, mazkur yer maydonini o‘z holiga keltirish va noqonuniy qurilgan inshootni bartaraf etish topshirilgan.
Ijro hujjati 2023-yil 21-dekabr kuni Majburiy ijro byurosining Urganch tumani bo‘limi ish yurituviga kelib tushgan. Ammo javobgar bir necha bor og‘zaki va yozma ogohlantirishlarga qaramasdan, sud talablarini ixtiyoriy ravishda bajarmagan.
Shundan so‘ng davlat ijrochilari tomonidan qonunga muvofiq majburiy ijro harakatlari boshlangan. Ushbu jarayon davomida noqonuniy qurilgan inshoot davlat hisobiga buzdirilib, yer maydoni avvalgi holatiga keltirilgan. Shu bilan ijro hujjati bo‘yicha ish yurituvi rasman yakunlandi.
Mutasaddilar ta’kidlashicha, hozirgi kunda noqonuniy qurilishlarga qarshi kurash mamlakat miqyosida tizimli ravishda olib borilmoqda. Bunday holatlar nafaqat yer qonunchiligini buzish, balki shaharsozlik va xavfsizlik talablariga ham tahdid soladi.
Huquqshunoslar eslatib o‘tishmoqda: fuqarolar har qanday qurilish ishlarini boshlashdan oldin tegishli ruxsatnoma va yer hujjatlarini rasmiylashtirishi shart. Aks holda, qurilgan inshoot davlat tomonidan buzilishi va zarar miqdori qurilish sohibi hisobidan qoplanishi mumkin.
Mazkur holat Xorazm viloyatida yerdan foydalanish tartibiga rioya etishning ahamiyatini yana bir bor ko‘rsatdi. Mutasaddi idoralar fuqarolarni qonun doirasida harakat qilishga, o‘zboshimchalikka yo‘l qo‘ymaslikka chaqirmoqda.
“Zamin”ni Telegramʻda oʻqing!
