Ijtimoiy tarmoqlarda Asaka tumanidagi Muzey ko‘cha yonida gaz baloni portlagani haqida turli xabarlar tarqaldi. Viloyat Favqulodda vaziyatlar boshqarmasi vaziyat yuzasidan batafsil ma’lumot berdi.
Rasmiy bayonotga ko‘ra, 17-noyabr kuni soat 16:41 da “112” yagona qutqaruv xizmatiga Asaka tumani, “Kamolot” MFY, Marg‘iloniy ko‘chasida joylashgan uylardan birida yong‘in kelib chiqqanligi haqida murojaat tushgan. Shunga muvofiq, 3 ta yong‘in-qutqaruv bo‘limi jamlanib, soat 16:55 da hodisa manziliga yetib borgan.
Yong‘in-qutqaruvchilarning tezkor harakati sabab yong‘in 16:59 da nazoratga olingan va 17:26 da to‘liq o‘chirilgan. Mutaxassislar uydagi shift, tom qismi hamda ayrim maishiy jihozlar zararlanganini tasdiqladi. Hodisa sabablari va aniq zarar miqdori o‘rganilmoqda. Eng muhimi — fuqarolar orasida tan jarohati olganlar qayd etilmadi.
“Zamin”ni Telegramʻda oʻqing!
