Qoraqalpog'iston va Toshkent shahrida o'tkazilgan tezkor tadbirlar davomida soxta AQSh dollarini sotishga uringan shaxslar qo'lga olindi. Bu haqda Bosh prokuratura huzuridagi Departament matbuot xizmati ma'lum qildi. Bu haqda podrobno.uz xabar beradi.
Toshkentning Yunusobod tumanida ikki fuqaro 9,9 ming dollar ko'rinishidagi qalbaki banknotlarni uchinchi shaxsga 5 ming dollarga sotmoqchi bo'lgan paytda ushlangan.
Qoraqalpog'istonning To'rtko'l tumanida esa yana bir fuqaro bank kassasida 700 dollar soxta kupyurani almashtirishga uringan va shu jarayonda qo'lga olingan.
Qalbaki valyutalar ashyoviy dalil sifatida rasmiy tartibda olib qo'yildi. Holatlar yuzasidan jinoyat ishlari qo'zg'atilib, hozirda tergov harakatlari olib borilmoqda.
Departament fuqarolarni O'zbekistonda hisob-kitoblarda qonuniy to'lov vositasi — milliy valyutadan foydalanishga chaqirdi. Qayd etilishicha, hatto shaxs banknot soxta ekanini bilmagan bo'lsa ham, uni muomalaga kiritishga urinish jinoiy javobgarlikka sabab bo'ladi.
Avvalroq poytaxtning Chilonzor tumanida ham katta miqdordagi xorijiy valyutani sotish bilan bog'liq holatda fuqaro ushlangani xabar qilingandi.
“Zamin”ni Telegramʻda oʻqing!
