Namangan shahrida yashovchi, 1984 yilda tug‘ilgan shaxs “Haj-2026” mavsumida fuqarolarni noqonuniy yo‘llar orqali Saudiya Arabistoniga yuborishni vaʼda qilib, katta miqdorda pul talab qilgani uchun huquqni muhofaza qiluvchi organlar tomonidan qo‘lga olindi.
Tekshiruv maʼlumotlariga ko‘ra, u Chust tumanida yashovchi 4 nafar fuqaroga haj safarini tashkil qilish evaziga 26 ming AQSH dollari so‘ragan. Bu mablag‘ esa “xizmat” sifatida ko‘rsatilgan.
Tezkor tadbir Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida amalga oshirildi. Jarayon davomida gumonlanuvchi 6 ming dollar pulni qabul qilayotgan vaqtda ashyoviy dalillar bilan ushlangan.
Holat bo‘yicha unga nisbatan Jinoyat kodeksining 168-moddasi — firibgarlik alomatlari asosida jinoyat ishi qo‘zg‘atilgan. Hozirda dastlabki tergov harakatlari davom ettirilmoqda.
Rasmiy maʼlumotlarga ko‘ra, “Haj” ziyoratini tashkil etish faqat davlat tomonidan belgilangan tartib asosida amalga oshiriladi. Bu jarayon Din ishlari bo‘yicha qo‘mita va Saudiya Arabistonining vakolatli idoralari o‘rtasidagi kelishuvlar asosida yo‘lga qo‘yilgan.
Shuningdek, ziyoratchilarni yuborish faqat O‘zbekiston musulmonlari idorasi orqali amalga oshiriladi. Norasmiy shaxslar yoki xususiy vaʼdalar orqali tashkil etilgan safarlar qonunga to‘liq zid hisoblanadi.
Qisqasi, mutasaddilar aholini bunday aldov va firibgarlik holatlaridan ehtiyot bo‘lishga chaqirmoqda. Haj kabi muqaddas amallar faqat rasmiy va ishonchli yo‘llar orqali amalga oshirilishi shart.
“Zamin”ni Telegramʻda oʻqing!
