Kezi kelganda aliment pullarini qarzdorning qarindoshlari toʻlamoqda
Navoiy viloyatida aliment to‘lashdan bo‘yin tovlab, xorijda yurgan qarzdorlarning yaqinlari farzandlar oldidagi moddiy majburiyatlarni o‘z zimmalariga olmoqda. Majburiy ijro bürosi tomonidan olib borilgan tushuntirish ishlari natijasida, Xatirchi va Navbahor tumanlarida ikki nafar qarzdorning onasi va qarindoshlari jami 132 million so‘mdan ortiq aliment pullarini to‘liq to‘lab berishdi. Bunday profilaktik tadbirlar bolalarning moddiy ta’minot huquqlarini tiklash va aliment qarzdorligini bartaraf etishga xizmat qilmoqda.
Barchamizga maʼlumki, farzandlarga moddiy yordam koʻrsatishni rad etish bola huquqlarining buzilishi hisoblanadi. Albatta, har bir inson u yoki bu vaziyatda qanday yoʻl tutishni oʻzi tanlaydi. Biroq, tanlangan yoʻl bolaning yuzidagi tabassumi va quvonchidan mahrum qilmasligi lozim.
Afsuski, bugungi kunda aliment pullarini oʻz vaqtida toʻlamasdan, farzandlarini moddiy taʼminlashdan boʻyin tovlab kelayotgan fuqarolar haqida tez-tez eshitib turamiz.
Majburiy ijro byurosining Navoiy viloyat boshqarmasi Qidiruv sho‘basi hamda hududiy boʻlimlar tomonidan olib borilgan targʻibot tadbirlari davomida aliment qarzdorlarning xorijiy davlatlarda ekanligi aniqlandi.
Olib borilgan tushuntirish va profilaktik tadbirlar davomida Byuroning Xatirchi tuman boʻlimi ish yurituvida boʻlgan qarzdor Q.N. Rossiya davlatida boʻlganligi sababli onasi tomonidan 51 mln 134 ming soʻm hamda Navbahor tuman boʻlimi ish yurituvida boʻlgan qarzdor R.R. Rossiya davlatida boʻlganligi sababli uning yaqin qarindoshlari tomonidan 81 mln. 531 ming soʻm aliment pullari toʻliq toʻlab berildi.
Izohlar 0
…