Samarqand viloyati Toyloq tumanida ikki nafar voyaga yetmagan qizga nisbatan zoʻravonlik holati aniqlanib, bu boʻyicha tekshiruv ishlari boshlangan.
Maʼlumotlarga koʻra, fuqaro M.S. oʻz qaramogʻida boʻlgan 2017 va 2019 yillarda tugʻilgan qizlarga nisbatan bosim oʻtkazgan. Uning maqsadi bolalarning xorijda boʻlgan onasidan pul undirish boʻlgani aytilmoqda.
Tekshiruv davomida ayol bolalarga nisbatan jismoniy va ruhiy tazyiq oʻtkazgani, shuningdek, ushbu holatlarni videoga olgani maʼlum boʻlgan.
Bolalar ombudsmani hududiy vakili voqea joyiga borib, ularni himoya qilish boʻyicha zarur choralarni koʻrgan.
Hozirda tuman ichki ishlar organlari tomonidan holat yuzasidan tergovga qadar tekshiruv ishlari olib borilmoqda.
Shu bilan birga, vasiylik organi M.S.ni vasiylik huquqidan mahrum qilgan. Bolalarga yetkazilgan jarohatlarni aniqlash uchun sud-tibbiy ekspertiza tayinlangan.
Qizlarning ruhiy holatini tiklash maqsadida psixologlar jalb etilgan. Ular hozirda oilaviy bolalar uyiga joylashtirilib, taʼlim muassasalariga rasmiylashtirilgan.
Mutaxassislar bolalarning xorijdagi onasining ota-onalik majburiyatlarini bajarish darajasini ham oʻrganmoqda.
“Zamin”ni Telegramʻda oʻqing!
