Oʻzbekistonda kiberxavfsizlikka tahdid soluvchi navbatdagi jinoiy faoliyatga chek qoʻyildi. Davlat xavfsizlik xizmati, Toshkent shahar IIBB xodimlari hamda «Kiberxavfsizlik markazi» DM mutaxassislari hamkorligida oʻtkazilgan tezkor tadbir davomida Telegram messenjeri orqali zararli «APK» dasturlarni tarqatish va sotish bilan shugʻullangan shaxs fosh etildi.
Maʼlum boʻlishicha, Toshkent viloyatining Chirchiq shahrida yashovchi, 2005 yilda tugʻilgan fuqaro oʻz qoʻli bilan yaratgan maxsus zararli dasturlarni internet orqali savdoga qoʻygan. U ushbu «APK» fayllarni 100 mingdan 300 ming soʻmgacha boʻlgan narxlarda sotib, kamida 10 nafarga yaqin mijozga yetkazib bergan.
Holatning eʼtiborli jihati shundaki, u faqatgina dasturlarni sotish bilan cheklanib qolmagan. Balki xaridorlarga texnik yordam koʻrsatib, ularni qanday ishlatish, qanday qilib boshqa shaxslarning akkauntlariga kirish va maʼlumotlarni olish boʻyicha ham maslahatlar berib borgan. Yaʼni bu yerda toʻliq shakllangan “xizmat paketi” mavjud boʻlgan.
Mutaxassislar taʼkidlashicha, ushbu zararli «APK» dasturlar orqali boshqalarning Telegram akkauntlariga ruxsatsiz kirish, qurilmadagi SMS-xabarlarni oʻqish, hatto toʻlov tizimlari orqali mablagʻlarni oʻzlashtirish imkoniyati yaratilgan. Bu esa fuqarolarning shaxsiy maʼlumotlari va moliyaviy xavfsizligi uchun jiddiy tahdid hisoblanadi.
Tekshiruv jarayonida aniqlanishicha, gumonlanuvchi Telegramda 5 tadan ortiq guruh va kanallarni boshqarib kelgan. Ushbu platformalarda u doimiy ravishda zararli dasturlarning “imkoniyatlari”ni reklama qilib, yangi mijozlarni jalb etishga harakat qilgan.
Tezkor tadbir vaqtida uning ixtiyoridan bir qator texnik vositalar ashyoviy dalil sifatida musodara qilindi. Jumladan, «Asus ExpertBook» rusumli noutbuk, «Redmi Note 10 Pro» smartfoni, tashqi qattiq disk hamda bank kartalari olib qoʻyilgan.
Hozirda mazkur shaxsga nisbatan jinoyat ishi qoʻzgʻatilib, tergov harakatlari olib borilmoqda. Mutaxassislar esa fuqarolarni nomaʼlum fayllar va dasturlarni yuklab olmaslikka, shaxsiy maʼlumotlarni himoya qilishga jiddiy eʼtibor qaratishga chaqirmoqda.
Bu holat bir haqiqatni yana bir bor koʻrsatdi: raqamli dunyoda ehtiyotkorlik — bu tanlov emas, balki zarurat.
“Zamin”ni Telegramʻda oʻqing!
