Toshkent shahri aholisi, ayniqsa Shayxontohur, Olmazor va Chilonzor tumanlarida yashovchilar uchun muhim ogohlantirish eʼlon qilindi. 2026 yil 4 maydan 8 maygacha poytaxtdagi «IM-3» qozonxonasida profilaktika va texnik xizmat koʻrsatish ishlari olib borilishi munosabati bilan issiq suv taʼminoti vaqtincha toʻxtatiladi.
Maʼlum qilinishicha, ushbu rejali uzilishlar besh kun davom etadi va bir qator mahalla hamda yirik turar-joy massivlarini qamrab oladi. Shuningdek, cheklovlar markaziy shohkoʻchalar va talabalar shaharchalariga ham taʼsir koʻrsatishi kutilmoqda.
Xususan, Shayxontohur tumanida Chorsu, Qoratosh, Gulobod, Xadra, Oʻrda, Shayxontohur kabi mahallalarda issiq suv taʼminoti vaqtincha toʻxtaydi. Olmazor tumanida Universitet shaharchasi, Qoraqamish 2/1 massivlari, Chustiy, Quyosh, Orzu va Universitet mahallalari qamrab olinadi.
Chilonzor tumanida esa Beshyogʻoch va Katta Olmazor hududlarida vaqtincha uzilishlar kuzatiladi. Shuningdek, Navoiy, Bunyodkor, Beruniy, Islom Karimov, Furqat, Samarqand Darvoza, Abdulla Qodiriy va KXAY kabi asosiy koʻchalar atrofida yashovchilar ham mazkur cheklovlarni his qilishlari mumkin.
Mutasaddilarning taʼkidlashicha, ushbu ishlar issiqlik taʼminoti tizimini yaxshilash va kelgusi mavsumda uzluksiz xizmat koʻrsatishni taʼminlash maqsadida amalga oshirilmoqda.
Shu munosabat bilan aholidan ushbu davrda zarur ehtiyojlar uchun oldindan tayyorgarlik koʻrish va vaqtinchalik noqulayliklarga tushunish bilan yondashish soʻralmoqda.
“Zamin”ni Telegramʻda oʻqing!
