Salkam 80 mln. so‘m aliment qarzi undirib berildi

Majburiy ijro byurosi Andijon shahar bo‘limi ish yurituvida bo‘lgan fuqarolik ishlari bo‘yicha Andijon tumanlararo sudining 09.12.2015 yildagi sud buyrug‘iga asosan qarzdor M.Raxmatullayevdan undiruvchi D.Shoxobaliyeva foydasiga bir nafar voyaga yetmagan farzandining moddiy ta’minoti uchun daromadlarining 1/4 qismi miqdorida aliment undirish ko‘rsatilgan.

Bo‘lim xodimlari tomonidan qarzdor M.Raxmatullayev aliment to‘lovlarini to‘lashi yuzasidan ogohlantirib kelingan bo‘lsa-da, biroq ota o‘z farzandining moddiy ta’minotidan bo‘yin tovlab kelgan. Shu sabab, qarzdorlik yig‘ilib, 01.11.2020 yil holatiga jami 79 mln 506 ming so‘mni tashkil etgan.

Mas’ul davlat ijrochisi tomonidan ijro hujjatining ijrosini ta’minlash maqsadida qarzdor bilan profilaktik suhbatlar olib borilib, qonunchilikda belgilangan javobgarlik yuzasidan tushuntirish beriladi.

Bundan xulosa chiqarib, kech bo‘lsa-da, bo‘ynidagi otalik mas’uliyatini tushunib yetgan qarzdor M.Raxmatullayev alimentdan bo‘lgan barcha qarzini to‘laydi. Joriy yilning 20 noyabr kuni 79 mln 506 ming so‘m aliment pullari undiruvchi D.Shoxobaliyevaga topshirilishi ta’minlandi. “Zamin”ni Telegramʻda oʻqing!