«Avatar» filmining 2, 3, 4, 5-talqinlari qachon namoyish etilishi ma’lum bo‘ldi

^{Foto: «Avatar» filmidan kadr}
Buyuk rejissyor Jeyms Kemeron suratga olgan, zamonaviy kinematografiyada burilish yasagan «Avatar» blokbasterining «ikkinchi talqini» — «Avatar-2» 2022 yilning dekabrida prokatlarga chiqadi. Ushbu xabarni shaxsan rejissyorning o‘zi Las-Vegasda bo‘lib o‘tayotgan CinemaCon konferensiyasida e’lon qildi.

«Avatar-2» — Kemeron faoliyatidagi eng keng ko‘lamli va uzoq loyiha, naq 13 yildan beri film ustida ishlamoqda. Konferensiyada kinoasarning tizer-roligi ham namoyish etilgan. Ushbu tizer videosi bir necha haftadan so‘ng paydo bo‘ladi — «Doktor Strenj» kinokomiksiga biriktiriladi. Internet-reliz may oyiga belgilangan.

«Avatar-2» (tagsarlavhasi «Suv yo‘li»)da voqealar birinchi filmdagi voqealardan so‘ng oradan yetti yil o‘tib yuz beradi. Bosh qahramonlar — Jeyk va Neytiri Pandorada baxtli turmush kechirib, ikki farzandni tarbiyalashmoqda. Qo‘qqisdan falokat yog‘iladi — sayyorani yana insoniyat zabt etmoqchi, Jeyk Salli va oilasi istiloga qarshi kurashish uchun Na’vi armiyasiga boshchilik qilishga otlanadi.

^{«Avatar-2» logotipi. 20th Century Studios, Disney Studios}
Birinchi «Avatar» 2009 yilda katta ekranlarga chiqib, eng kassali filmlar reytingini boshqargandi. Shu kunlarda Jeyms Kemeron filmning bir yo‘la to‘rt talqini — «Avatar-2», «Avatar-3», «Avatar-4» va «Avatar-5» ustida ishlamoqda. Kinoseriyaning ikkinchi qismi 2022 yilning dekabrida, qolganlari 2023, 2024 va 2025 yillarda namoyish etilishi rejalashtirilgan.

Kemeronning aytishicha, garchi syujet yo‘nalishi bir xil bo‘lgani bilan, har bir «Avatar» yakuniy to‘xtamga ega alohida hikoya. “Zamin” yangiliklarini “Facebook”da kuzatib boring