“Tan olinmagan farzandman”: Botir Qodirov 15 ta farzandi borligi va unga Sherali Joʻraevning qoʻshiqlarini aytishni taqiqlashgani haqida

Xonanda Botir Qodirov YouTube'dagi “Chotki TV” kanaliga bergan intervyusida otasi tomonidan tan olinmagani va farzandlarining soni haqidagi savollarga  javob berdi.

— Oʻz vaqtida tan olinmagan farzandman. Oʻsha paytda katta oila qilishni va ularni adolat bilan boshqarishni niyat qilganman. Hozirgi kunda 15 nafar farzandim bor va ularning har biridan faxrlanaman. Toʻgʻri, ular bitta onadan emas, ammo ularning hammasini tan olaman. Farzandlarimning bari bir-birini tanishadi va doʻstona munosabatda boʻlishadi. Boshqa oilamdan boʻlgan farzandlarim birinchi oilamga kelib, bemalol oʻynashadi. Farzandlarim uchun albatta vaqt ajrataman. Ularning barini yigʻib, istirohat bogʻiga yoki ovqatlanishga olib boraman. Uzun stol buyurtirib, miriqib ovqatlanamiz.

Jigarlarning bir-biriga boʻlgan munosabati iliq ekanligidan xursandman. Oʻylashimcha, hammasi erkak kishining oʻziga bogʻliq. Inson farzand koʻrdimi, uni tan olishi kerak. Aksincha ish tutish esa, nomardning ishi hisoblanadi. Xotindan qoʻrqib ish tutish erkak kishiga xos boʻlgan ish emas. Chiroyli yoki mansabdor ayolining ketib qolishidan qoʻrqib, boshqa oilasidan boʻlgan farzandini tan olmaslik yoki uni yashirish erkak kishiga xos ish emas. Tugʻdirgandan keyin bolani tan olib, voyaga etguniga qadar unga mehr berish, ulgʻaytirish otalik burchi deb bilaman.

Rosti, farzandidan voz kechadigan yoki bitta ayol bilan munosabatlarini uzib, boshqa oila qurganidan keyin farzandlarini ham unutib qoʻyadigan erkaklarning ishini tushunmayman. Toʻgʻri, xotin koʻchada millionta boʻlishi kerak. Bittasiga uylansangiz, u ayolingiz boʻlib ketaveradi. Ammo farzand erkakning bir boʻlagi, uning vujudidan yaralgan inson. Buning savol-javobi juda ogʻir boʻladi, siz farzandingizdan voz kechdingizmi, kun kelib sizdan ham voz kechishadi. Bu qaytar dunyo, — deydi Botir Qodirov.

Boshlovchi xonandadan otasi haqida ochiqcha gapirishini soʻraganida, Botir Qodirov quyidagicha javob berdi.

— Bu savolga javobni qiyomatga qoldirganman. Sizga bir qiziq rivoyatni aytib beraman. Bir oilada oʻgʻil farzand dunyoga kelibdi. U ota-onasi bilan baxtli yashabdi. Ammo bola 5 yoshga toʻlganida ota-onasi ayrim sabablarga koʻra ajrashibdi. Ammo ota farzandidan xabar olar, bola ham ota tomon qarindoshlari bilan bordi-keldi qilar ekan. Bobo-buvisining uyiga borar, ular orasidagi munosabat nihoyatda iliq ekan. Bola 20 yoshga toʻlganida bir quchoq orzu-umidlar bilan otasi yashaydigan shaharga keladi va undan yordam soʻraydi.

“Seni oʻqitaman” degan ota gapining ustidan chiqmaydi. Bir kuni bolaning oldiga otasining tan soqchisi kelib, uni xoʻjayinining oldiga olib boradi. Ota bolasiga juda qiyin shart qoʻyadi, ya'ni u bergan familiyadan voz kechishini soʻraydi. Chunki u paytda bola oʻz kuchi bilan tanilib kelayotgan bir payt edi. Bola onasining oldiga borib, boʻlgan voqealarni aytib beradi. Oxiri otasining emas, onasining familiyasi bilan maqsadlarini amalga oshirishga qaror qiladi.

Ammo bu oson kechmaydi. 20 yoshiga qadar falonchining oʻgʻli boʻlgan inson birdan familiyasini oʻzgartirsa, odamlar har xil qabul qilishadi. Mish-mishlar, ortiqcha gap-soʻzlar... Allohning inoyati bilan bola oʻz kuchi bilan maqsadlarini amalga oshiradi, hatto otasining familiyasisiz ham mashhurlikka erishadi. Va u otasining xatti-harakatlarining javobini qiyomatga qoldiradi. 
Ba'zi odamlar “Botir ochigʻini aytmaydi, qoʻrqadi”, deb oʻylashlari mumkin. Ammo men hech narsadan qoʻrqmayman, agar istashsa, gen ekspertiza qildirishga ham tayyorman, — deydi xonanda Botir Qodirov.

Xonanda betob boʻlganida onasini tushida koʻrgani haqida soʻzlab berdi.

— Yaqinda burnimni operatsiya qildirdim. Aslida unaqa ogʻir amaliyot emas. Ammo oʻsha kuni onam tushimga kirdi. Ruhlar olami bor, onam mendan xavotir olganini sezdim, — deydi xonanda Botir Qodirov.

Botir Qodirovga Sherali Joʻraevning qoʻshiqlarini kuylashni taqiqlashgani va bu huquq faqat Shohjahon va Zohirshoh Joʻraevga berilgani haqida aytib oʻtdi.

— Toʻy xizmatlarining birida Sherali Joʻraevning qoʻshigʻini ijro etganim bilan bogʻliq videoni Instagram tarmogʻiga joylagandim. Uyimga ogohlantirish xati keldi. “Bu qoʻshiqni kuylashingiz mumkin emas, bu huquq faqat Shohjahon va Zohirshoh Joʻraevlarga berilgan”, degan mazmundagi ogohlantirish xati ekan. Achchigʻim chiqdi va oʻsha kuni ularning prodyuseriga qoʻngʻiroq qildim. U aka bilan ilgari birga ishlaganimiz uchun meni “Meni Shohjahon yoki Zohirshoh bilan uchrashtiring, men hech qanday yomon ish qilganim yoʻq-ku, ularga nima yoqmabdi”, dedim. Ammo u meni uchrashtirgani yoʻq.

Aslida, mening mualliflik qoʻshiqlarim koʻp, toʻylarga falonchining emas, aynan oʻzimning qoʻshiqlarimni aytishim uchun taklif qilishadi. Ammo qoʻshiq yashashi uchun uni qayta-qayta ijro etishsa, yaxshi-ku. Buning qanday yomon tomoni bor? Bu dunyodan hech bir inson zigʻircha narsani ham oʻzi bilan olib ketolmagan. Qoʻshiq uchun talashish qanchalik toʻgʻri ekan?! Shaxsan men qoʻshiqlarimni ijro etishlariga qarshi emasman, qaytanga boshqalar ham ijro etishsa, ularning umri uzayib boraveradi, — deydi Botir Qodirov.

Шухрат Раззаков

«ZAMIN.UZ» muharriri