Amazon “Tomb Raider” asosidagi serialning kengaytirilgan aktyorlar tarkibini rasman e’lon qildi: loyiha uchun biryo‘la 11 nafar ijrochi tasdiqlandi. Eng e’tiborli yangiliklardan biri — Sigurni Uiverning ishtiroki bo‘lib, avval bu haqda ichki manbalar gapirgan, endi esa ma’lumot rasmiy tasdiqini topdi. Bu haqda playground.ru xabar beradi.
Uiver serialda Lara Kroftning qobiliyatlariga qiziqadigan, ta’sirchan va sirli ayol — Evelin Uollis obrazini gavdalantiradi. Shuningdek, tomoshabinlarga “Garri Potter”dagi Lyutsius Malfoy roli bilan tanish Jeyson Ayzeks ham aktyorlar safiga qo‘shildi: u bosh qahramonning amakisi Atlas de Morneni ijro etadi.
Butler Uinston rolini Bill Paterson, texnik yordamchi Zip rolini esa Martin Bobb-Sempl o‘ynaydi. Bundan tashqari, Jek Bannon, Selia Imri, Jon Heffernan, Paterson Jozef, Sasha Luss, Julett Motamed va Avgust Vitgenshtayn ham serialda ko‘rinish beradi — ularning barchasi aynan shu loyiha uchun yaratilgan original qahramonlarni ijro etadi.
Ijtimoiy tarmoqlarda esa ayrim muxlislar kasting yuzasidan kinoyali izohlar qoldirdi: kimdir Uiver qahramoni “maydonga chiqmay, faqat yo‘l ochib, ekspeditsiyaga uchib ketishi”ni taxmin qilgan, boshqalar esa e’lon bilan birga qo‘yilgan surat tanlovini tanqid qilgan.
“Zamin”ni Telegramʻda oʻqing!
