O‘zbekistonda xorij qo‘shiqlarini ko‘chirib kuylash taqiqlanish arafasida

Internet tarmog‘ida O‘zbekistonda mahalliy musiqachilarga xorij qo‘shiqlarini tarjima qilib, tarona yaratish taqiqlangani haqida xabar tarqaldi.

Mazkur chora o‘zbek milliy musiqasi yo‘qolishining oldini olish maqsadida amalga oshirilayotgani aytilmoqda. So‘nggi paytlarda haqiqiy o‘zbekona ohanglardan ko‘ra, tayyor turk, arab, eron, rus qo‘shiqlarining o‘zbekchalashtirilgan varianti ko‘proq quloqqa chalinadi. Bu o‘qimishli qatlamning e’tirozlariga sabab bo‘lmoqda.

“Agar shunday chora qo‘llanmasa, o‘zbek urf-odatlari yo‘qolib ketadi va biz 5 ming yillik tarixga ega bo‘lgan o‘zbek musiqasisiz qolamiz”, deya vaziyatga izoh beradi O‘zbekiston Milliy universiteti o‘qituvchisi Jo‘raqul Shukurov.

Biz bu xabar to‘g‘ri yoki noto‘g‘riligini bilish uchun “O‘zbekkonsert” davlat muassasasi bilan bog‘landik. Agentlik vakilining so‘zlariga qaraganda, bu borada hozircha aniq qaror yoki biror-bir hujjat yo‘q. Lekin ayni paytda shunday bandni san’atkorlar bilan tuziladigan shartnomaga kiritish borasida ishlar olib borilmoqda. Ya’ni u xorijiy musiqalarni ruxsatsiz o‘zbek tilida kuylashni cheklashga oid chora-tadbirlar qo‘llash arafasida turishganini ma’lum qildi. Sababi bu plagiat mahsulot hisoblanadi.

Demak, tez orada qo‘shiqchilar va bastakorlarga xorijiy musiqalarga o‘zbekcha she’r yozib, tarona yaratish taqiqlanishi yoki chegaralanishi mumkin.

Eslatib o‘tamiz, 1 iyuldan boshlab kliplarni YouTube’ga “O‘zbekkonsert”ning maxsus badiiy kengashi ruxsatisiz joylashtirish taqiqlanadi. Badiiy kengash tarkibi ertaga, 1 iyul kuni ma’lum bo‘ladi. “Zamin” yangiliklarini “Facebook”da kuzatib boring