“NTV-Plyus” bosh direktori: “Buvim sof oʻzbek tilida gaplashardi”

Toshkentda Oʻzbekiston-Rossiya media-forumi oʻtkazilmoqda. Mazkur tadbirda Oʻzbekiston va Rossiyaning yetakchi davlat va nodavlat OAVlari rahbarlari, taniqli ijodiy xodimlar, jurnalistika va axborot texnologiyalari yoʻnalishi mutaxassislarini tayyorlashga ixtisoslashtirilgan oliy talim muassasalarining professor-oʻqituvchilari, talabalar qatnashmoqda.

«OʻzA» nashri xabar berishicha, media-forumida Rossiyaning eng yirik telekompaniyasi – “NTV-Plyus” bosh direktori Mixail Dyomin ham ishtirok etmoqda.

Bugungi kunda “NTV-Plyus” — sunʼiy yoʻldosh raqamli televideniye (HDTV)ning 270 ta kanalini oʻzida jamlagan, Rossiya bozorida muvaffaqiyat qozongan yetakchi kompaniyalardan.

“Oʻzbekiston-Rossiya media-forumi ilk bora oʻtkazilmoqda. Mazkur tadbir ikki mamlakatning media sohasi boʻyicha faol hamkorlik qilishida koʻprik vazifasini oʻtaydi. Biz oʻzaro muloqotda kompaniyamizning telekommunikatsiya sohasidagi tajribalari bilan oʻrtoqlashdik”, — dedi nashrga bergan intervyusida Mixail Dyomin.

Toshkent taassurotlari bilan oʻrtoqlashsangiz, degan savolga:

— Bilasizmi, men Toshkentda tugʻilganman, u mening ona shahrim, bolaligim yodgorligi. Doim “Farhod” bozoridan bozor-oʻchar qilardik. Buvimni aytmaysizmi, sof oʻzbek tilida gaplashardi. Bularning bari kechagidek yodimda, — deb javob qaytargan. “Zamin”ni Telegramʻda oʻqing!