Yulduz Usmonovaning bu yilgi kontserti qanday oʻtadi?

^{Foto: «Daryo»}
Muxlislar oʻzbek primadonnasi Yulduz Usmonovaning bu yilgi kontsertini ham orziqib kutishmoqda. Xonanda ham navbatdagi kontsertiga jiddiy tayyorgarlik koʻrayotgani aniq. Keti uzilmayotgan premeralar ham Yulduz Usmonova ijodidagi yangiliklarning bisyorligidan darak bermoqda. «Daryo» muxbirlari «Xalqlar doʻstligi» saroyida boʻlib oʻtgan Oʻzbekiston xalq artisti Yulduz Usmonovaning repetitsiya jarayonlaridan reportaj tayyorladi.

Kontsert tashkilotchisining ma'lum qilishicha, Yulduz Usmonova ilk marta kontsert bermayotgan boʻlsa-da, tayyorgarlik jarayonlari har kuni boʻlib oʻtgani va unda 50 dan ortqi kishi jalb etilganligini ma'lum qildi. Xonanda ishchi xodimlarning koʻngildagidek ishlashi uchun ehson dasturxonlarini yozdi. Xonandaning hamkasblari va shogirdlari ham bunday xayrli ishga oʻz hissalarini qoʻshishdi.

Yulduz Usmonovaning yaqin koʻmakchisiga aylangan qiziqchi Halima Ibragimova ham kontsertda bosh-qosh.

— Men bu erda rejissyor yordamchisiman. Mansur Agaliev esa rejissyor. Nasib qilsa, bugun soʻnggi repetitsiya jarayonlari boʻlib oʻtadi. Oʻtgan yili ham opaning taklifiga koʻra, rejissyor yordamchisi boʻlgandim. Mansur Agaliev chiroq, ovoz, sahna bilan bogʻliq ishlarga mas'ul. Men esa opaning sahnaga chiqishi va raqqosalarning ishtirokiga javob beraman.

Yulduz Usmonova boshqalardek kontsert berishni istamaydi. Hamma ishga sidqidildan yondashishni yaxshi koʻradi. Masalan, oʻtgan yili sahna koʻk rangda bezatilgandi, bu yil esa siyohrangda. Hatto opaning talabiga koʻra sahnaning tagi ochilib, chiroq ham joylashtirildi. Yulduz Usmonova uchun xarajat va mehnatning ahamiyati yoʻq, muhimi xalq uchun chiroyli kontsert boʻlishi kerak.

Doʻstlik oʻzi yoʻliga, ammo ishda mas'uliyat boʻlishi kerak. Baqir-chaqir qilib boʻlsa-da, ishimni bajaraman. Shu bois opa ham indamaydilar. Kontsert arafasida saroydagi barcha pardalar almashtirildi. Buning uchun ozmuncha mato ketgani yoʻq. Agar ularni pulga chaqadigan boʻlsak, yaxshigina mablagʻ ketgani ayon boʻladi. Ammo koʻrib turganingizdek, sahnadagi chiqishning oʻzi ham odamga boshqacha kayfiyat beryapti.

Opaning energiyasiga tan beraman. Repetitsiya, xalq xizmatlaridan ortiq yana ijod qilishga kuch topadi. Tungi soat 3 da qoʻngʻiroq qilib kontsert bilan bogʻliq masalalarni soʻraydi. Uxlasangiz-chi, deb kulaman. Mana hozir ham sahnadagi monitorlar qanday boʻlayotganligini koʻrish uchun keldi, — deydi qiziqchi Halima Ibragimova.

Yulduz Usmonovaning turmush oʻrtogʻi va prodyuseri Mansur Agaliev jamoaning rahbari hisoblanadi.

— Aslida sahna va zaldagi oʻzgarishlar shart emasdi. Ularsiz ham Yulduz Usmonovaning kontserti a'lo oʻtishi aniq. Ammo u oʻzgacha boʻlishni, atrof ham ijodiy atmosferaga mos boʻlishini istaydi. Bu borada uni qoʻllab-quvvatlayman.

Kontsert biletlari «qora bozor»ga chiqib ketganligi haqida eshitdim. Ammo bunga mening aloqam yoʻq. Biror marta kassaga borib, sotuv qanday boʻlayotganligiga qiziqib ham koʻrmadim. Bu ishga boshqa shaxslar biriktirilgan. Kontsertning xarajati katta, undan daromad olishni maqsad qilmaymiz. Boshqa xonandalar kontsertdan koʻproq pul topishni istasa, Yulduz Usmonova katta xarajat qilib boʻlsa-da, koʻngildagidek kontsert berishni istaydi.

Ishonasizmi, raqqosalar boshqa kontsertlarda kiygan kiyimlarini bu dasturda kiyishmaydi. Ular uchun maxsus liboslar yaratiladi, undan keyin istagan kontsertlarida kiyib yuraverishadi.

Mana, ikki kundan beri uyqu yoʻq. Nasib qilsa, bu jarayon yana 16 kun davom etadi.

May oyida ham toʻrt kunlik «Nastalgiya» kontsert dasturini oʻtkazishni reja qildik. Bu taklif mendan chiqdi. Chunki xorij san'atkorlari, xususan, Tarkan kontsertda faqat yangi qoʻshiq aytmaydi. Kontsertdagi quloqqa notanish boʻlgan qoʻshiqni odamlar bir marta eshitganda anglab ololmaydi. Shuning uchun qoʻshiqlarni kontsertdan 3-4 oy avval muxlislarga taqdim etishi kerak. Ammo oʻzbek san'atida biroz boshqacha. Martdagi kontsertni yakunlab, maydagi dasturga tayyorgarliklarni boshlaymiz. Yoshi katta va xonandaning eski qoʻshiqlarini sogʻingan insonlar uchun bu yangilik boʻladi, — deydi Yulduz Usmonovaning turmush oʻrtogʻi va prodyuseri Mansur Agaliev.

Eslatib oʻtamiz, xonandaning kontsert dasturi 10—25 mart kunlari «Xalqlar doʻstligi» san'at saroyida boʻlib oʻtadi. “Zamin” yangiliklarini “Telegram”da kuzatib boring