Madaniyat vazirligining Yulduz Usmonova «nasihati»ga munosabati muhokamalarga sabab boʻldi

^{Foto: «Daryo»}
Shu kunlarda ijtimoiy tarmoqlarda keng tarqalib, muhokamalarga sabab boʻlayotgan, Oʻzbekiston xalq artisti Yulduz Usmonovaning kontsert dasturidan yozib olingan videolavha yuzasidan Madaniyat vazirligi munosabat bildirgandi.

Ushbu rasmiy munosabat ijtimoiy tarmoq foydalanuvchilari va blogerlarning muhokamalariga sabab boʻlmoqda.

«Yulduz Usmonova masalasida Madaniyat vazirligi rasmiy munosabat bildirib, «qars ikki qoʻldan chiqadi» degan mazmunda tomoshabinlarga va Yulduzxonimga teng tanbeh beribdi», deb yozadi bloger Shahnoza Soatova.

«Munosabatda vazirlik «zaldagi madaniyatsizlik» (qoʻshtirnoq sababi, bu hodisa qanday boʻlgani, zaldan qay darajada va tarzda madaniyatsizlik koʻrsatilganini bilmaymiz) va sahnadagi madaniyatsizlikni bir qatorga qoʻyyapti. Bir nechta «madaniyatsiz tomoshabin»ni deb salkam 5 ming odamga nisbatan qilingan hurmatsizlikni (yumshoq aytganda) teng koʻryapti, bir nechta «tartibsiz» iste'molchi bilan qoʻlida mikrofon tutgan, minglab odamlarga murojaat qilish huquqi va imkoniyatiga ega xalq artistining ma'naviy burchini bir xil deb baholayapti. Mayli, bu ularning adolati.

Endi savol: toʻyda (xususiy tadbirda) bir odamni soʻkkan AvazBEK Olimovdan «boshqa qilmayman» degan mazmunda tushuntirish xati yozdirib olgan tizim Yulduz Usmonovaning sahnadan (!) turib qilgan odobsizligini shunchaki ogʻzaki «oqlamay, qoralab» qoʻyaqolishi ham ularning adolatimi?

«Hammaga teng» tartiblaringizdan...

Shu paytgacha Yulduz opa Ichki ishlar tizimini soʻkdi, shoirni soʻkdi, tomoshabinlarni soʻkdi... Bu oxirgisi deb umid qilishga asos ham yoʻq, chunki jazolanmagan ayb takrorlanaveradi, xulosalar badbin qolaveradi», deya qayd etadi Shahnoza Soatova.

«Yulduz Usmonovani na Madaniyat vazirligi, na davlatning boshqa bir tuzilmasi jazolashi kerak, tanbeh ham berishi shart emas. Yulduz Usmonova jamoatchilikka qoʻpollik qildi, uni jamoatchilikning oʻzi jazolashi kerak. Instagramda yo Tvitterda uni soʻkkan bilan u jazolanib qolmaydi. Odamlarimiz bir boʻlib, uyushib, uni toʻyga chaqirmay qoʻysin: hech kim chaqirmasin shu artistni toʻyga, uni toʻyga chaqirmaslikni bir-biriga targʻib qilsin odamlarimiz — eng yaxshi jazo shu unga.

Lekin bizning odamlarimiz unday qilishmaydi. Hatto shu artistning haqoratlarini eshitib, unga qarsak chalishdi-ku — qarang, qanday bagʻrikenglik! Shuning uchun ham OʻzAvtoMotors yiliga millionlab dollar, yuz milliardlab soʻm foyda koʻrishda davom etyapti, ma'nan eskirgan «yangi» mashinalarining narxini behijolat oshiryapti. Chunki...

Odamlarimiz shunga munosib. Shunga munosibmiz, hozircha. Lekin qachondir bu oʻzgaradi, oʻzgarishi kerak — chunki biz, hammamiz, yaxshirogʻiga — odobliroq artistlarga, sifatliroq avtomobillarga, farovonroq hayotga, eng kamida, yaxshiroq munosabatga loyiqmiz. Bunga shubha yoʻq», deb yozadi bloger Muhrim A'zamxoʻjaev. “Zamin” yangiliklarini “Telegram”da kuzatib boring