O‘zbekistonda dam olish kunlari havo keskin isiydi: tafsilotlar

«O‘zgidromet» 26—27 aprel kunlari O‘zbekistonda kuzatiladigan ob-havo haqida ma’lumot berdi. Bu haqda tashkilotning rasmiy sayti xabar tarqatdi.

Mutaxassislarning ma’lum qilishicha, mamlakat hududida dam olish kunlari havo ochiq, ayrim hududlarda esa qisman bulutli bo‘ladi. Bu kunlarda yog‘ingarchilik kutilmaydi. Shamolning tezligi sharq tomondan soniyasiga 7-12 metrni tashkil etadi, ammo ba’zi viloyatlarda chang‘-to‘zon bilan birga soniyasiga 15-20 metrgacha kuchayishi mumkin.

Havo harorati esa butun mamlakat bo‘ylab muntazam ravishda oshib boradi. Xususan, juma kuni kunduzi 27-30 daraja issiq kutilsa, yakshanba kuniga kelib bu ko‘rsatkich 32-35 darajagacha ko‘tariladi. Shimoliy, janubiy va cho‘l hududlarda esa harorat yanada yuqori bo‘lib, ba’zi joylarda 36-39 darajaga yetishi taxmin qilinmoqda.

Poytaxt Toshkentda 25—27 aprel kunlari ob-havo asosan quyoshli bo‘lib, yog‘ingarchilik kuzatilmaydi. Bugun, 25 aprel kuni havo harorati kunduzi 28-30 daraja issiq bo‘ladi. Shanba kuni harorat 30-32 darajaga, yakshanba kuni esa 32-34 darajagacha ko‘tariladi. Kechalari esa havo harorati 15-18 daraja atrofida saqlanib qoladi.

Umuman olganda, O‘zbekistonda hafta davomida havo harorati asta-sekin ko‘tarilib borayotgani kuzatilmoqda. Ob-havo mutaxassislari fuqarolarni bu kunlarda quyosh nuridan himoyalanish va suv iste’molini ko‘paytirishni tavsiya etishmoqda. “Zamin”ni Telegramʻda oʻqing!