Yaqin yillarda Toshkent viloyatida yangi xalqaro aeroport qurilishi rejalashtirilmoqda. Mazkur loyiha O‘zbekiston aviatsiya infratuzilmasini rivojlantirish, yo‘lovchilarga qulaylik yaratish hamda xalqaro aloqalarni kengaytirish maqsadida amalga oshiriladi.
Ma’lum qilinishicha, Toshkent shahrida joylashgan hozirgi aeroport 2030 yilgacha kutilgan 15 milliongacha yo‘lovchi oqimini qabul qilish imkoniyatiga ega emas. Shu sababli, hukumat va mas’ul tashkilotlar yangi aeroport qurishga qaror qilgan.
Loyiha davlat-xususiy sheriklik asosida moliyalashtirilishi rejalashtirilmoqda. Hozirda turli davlatlardan takliflar kelib tushmoqda, shu jumladan yetakchi xorijiy kompaniyalar ham qiziqish bildirmoqda.
Yangi aeroport shahar markazidan tashqaridagi qulay va strategik joyda joylashtiriladi. U xalqaro me’yor va talablarga to‘liq javob beradigan, zamonaviy texnologiyalar bilan jihozlangan, yo‘lovchilarga tezkor va qulay xizmat ko‘rsatish imkoniyatiga ega hudud bo‘ladi.
Shu bilan birga, aeroport atrofida logistika markazlari, mehmonxonalar va biznes obyektlari ham qurilishi kutilmoqda. Bu esa nafaqat turizm va tranzit salohiyatni, balki mahalliy iqtisodiyotni ham sezilarli darajada qo‘llab-quvvatlaydi.
