O‘zbekiston aholisini yaqin kunlarda noodatiy tabiiy holat — kuchli magnit bo‘ronlari kutmoqda. Meteagent tarqatgan ma’lumotlarga ko‘ra, 1 va 2 sentyabr kunlari mamlakatimizda “qizil darajali” deb baholanadigan geomagnit noqulayliklar yuzaga chiqadi.
Mutaxassislar bildirishicha, 1 sentyabr kuni ertalabdanoq magnit maydonlarida jiddiy o‘zgarishlar qayd etilishi bashorat qilinmoqda. Kuni kecha boshlangan noqulayliklar ikkinchi kuni yanada kuchayib, 6,7 ballgacha yetishi mumkin. Bu esa sog‘lig‘i muammoli odamlar uchun jiddiy sinov bo‘lishi tayin.
Xususan, yurak-qon tomir kasalliklariga chalingan bemorlar, asab tizimida uzoq yillik muammolarga duch kelganlar, qandli diabet yoki bronxial astma bilan og‘riganlar magnit bo‘ronlarining salbiy ta’sirini kuchliroq his qilishlari mumkin. Shuningdek, ob-havo o‘zgarishiga sezgir odamlar ham turli noxush holatlarni boshdan kechirishlari ehtimoldan xoli emas.
Meteopatiya bilan bog‘liq belgilar — bosh og‘rig‘i, qon bosimining keskin o‘zgarishi, uyqusizlik yoki tez charchash kabi holatlar avj olishi mumkinligi haqida ham ogohlantirilmoqda. Shu sababli mutaxassislar aholini ayniqsa ertalab sog‘lig‘ini nazorat qilishga, ko‘proq dam olishga va og‘ir jismoniy mehnatdan tiyilishga chaqirmoqda.
Fizik jihatdan sog‘lom odamlar uchun ham bunday beqaror kosmik jarayonlar ma’lum noqulaylik tug‘dirishi mumkin. Ayniqsa, kayfiyatda o‘zgarishlar, diqqatning pasayishi va tez charchash holatlari kuzatilishi mumkin.
Shu tariqa, 1 va 2 sentyabr kunlari mamlakatda kuzatiladigan magnit bo‘ronlari nafaqat tibbiy jihatdan ehtiyotkorlik talab qiladi, balki insonlarning kundalik faoliyatiga ham ma’lum darajada ta’sir ko‘rsatishi mumkin. Meteorologlar va tibbiyot xodimlari aholini bu kunlarda ehtiyotkor bo‘lishga chaqirmoqda.
“Zamin”ni Telegramʻda oʻqing!
