O‘zbekiston Prezidenti Shavkat Mirziyoyev kelasi oy Yevropaga safar qilishi kutilmoqda. Rasmiy ma’lumotlarga ko‘ra, davlat rahbari 24 oktyabr kuni Belgiya poytaxti Bryusselda bo‘ladi. Bu haqida Yevropa kengashi Prezidenti Antoniu Koshta Shavkat Mirziyoyevga yo‘llagan tabriknomasida ta’kidlagan.
Ma’lumotlarga ko‘ra, safar davomida Yevropa Ittifoqi va O‘zbekiston o‘rtasidagi munosabatlarda yangi bosqichni belgilaydigan muhim hujjat — Kengaytirilgan sheriklik va hamkorlik to‘g‘risidagi bitim imzolanishi kutilmoqda.
Antoniu Koshta o‘z maktubida:
“Siz bilan 2025 yil 24 oktyabr kuni Bryusselda bo‘lib o‘tadigan uchrashuvni intiqlik bilan kutaman. U yerda Yevropa Ittifoqi va O‘zbekiston o‘rtasidagi hamkorlikni yanada chuqurlashtirish imkoni paydo bo‘ladi”, — deya qayd etgan.
Shuningdek, Yevropa kengashi rahbari o‘tgan aprel oyida Samarqandda bo‘lib o‘tgan “Yevropa Ittifoqi – Markaziy Osiyo” birinchi sammiti haqida ham to‘xtaldi. U o‘sha tashrif davomida o‘zbek xalqiga xos samimiylik va mehmondo‘stlikni his etganini, bu voqea unda yorqin xotiralar qoldirganini ta’kidlagan.
Shu tariqa, Bryusseldagi oktyabr uchrashuvi nafaqat siyosiy muloqot, balki Yevropa va O‘zbekiston munosabatlarida yangi sahifa ochishi kutilayotgan muhim voqea sifatida baholanmoqda.
“Zamin”ni Telegramʻda oʻqing!
