Toshkent shahar hokimligi poytaxtda turizm yo‘nalishlarini bir-biriga bog‘laydigan yangi transport tizimini yo‘lga qo‘yishini ma’lum qildi. Yangi tartibga ko‘ra, endi soat 22:00 dan ertalabki 06:00 gacha maxsus “tungi avtobuslar” harakatlanadi. Ular orqali yo‘lovchilar aeroport, temiryo‘l vokzali, metro bekatlari, yirik bozorlar, savdo markazlari va talabalar yotoqxonalariga bemalol yetib olishlari mumkin bo‘ladi.
Hokimlik ma’lumotlariga ko‘ra, dastlabki bosqichda 15 ta yo‘nalish ishga tushiriladi va avtobuslar har yarim soatda qatnaydi. Maxsus yo‘nalishlarda qatnaydigan avtobuslar oddiy transportdan farqli ravishda qizil rangga bo‘yaladi va “T1”, “T2” kabi raqamlar bilan belgilanadi. Shu orqali ularni boshqalardan oson ajratish mumkin bo‘ladi.
Avtobuslar zamonaviy talablarga javob beradi: salonlar konditsioner va bepul Wi-Fi bilan jihozlanadi, videokuzatuv tizimi o‘rnatiladi, imkoniyati cheklangan yo‘lovchilar uchun esa qulay sharoitlar yaratiladi. Yo‘lkira esa odatiy avtobuslardagi narxdan farq qilmaydi.
Poytaxt transport boshqarmasi vakili Olloyor Norbutayevning aytishicha, loyiha ikki bosqichda amalga oshiriladi va jami 54 ta avtobus yo‘lovchilarga xizmat ko‘rsatadi. Ilk yillarda xarajatlar mahalliy budjetdan qoplanadi, umumiy hisob-kitob bo‘yicha 33 milliard so‘m sarflanishi kutilmoqda. Shu bilan birga, hokimiyat bunday tizim daromaddan ko‘ra ko‘proq aholiga qulaylik yaratish maqsadini ko‘zlayotganini ta’kidlamoqda.
Mutaxassislar fikricha, poytaxtda turizm oqimini oshirish va shaharning transport infratuzilmasini rivojlantirishda bu kabi qadamlar katta ahamiyatga ega. Yo‘lovchilar uchun qulay va xavfsiz kechasi ham harakatlanish imkoniyati yaratilishi shahar nufuzini oshirishi tabiiy.
“Zamin”ni Telegramʻda oʻqing!
