O‘zbekistonda ta’lim sohasida yana bir yangi islohot joriy etiladi. Prezident Shavkat Mirziyoyev 9 sentyabr kuni o‘tkazgan videoselektor yig‘ilishida ma’lum qilinishicha, endi maktabni yuqori baholar bilan tamomlagan iqtidorli yoshlar ayrim oliy ta’lim muassasalarining 2-kursiga to‘g‘ridan-to‘g‘ri qabul qilinadi, deb xabar berdi kursiv.media.
Yangi tizim nimani anglatadi?
Avval talabalar maktabdan keyin oliygohning 1-kursiga kirib, keyin bosqichma-bosqich o‘qishni davom ettirar edi. Yangi islohot orqali esa tajribasi va bilim saviyasi yuqori bo‘lgan maktab bitiruvchilari vaqtni tejab, to‘g‘ridan-to‘g‘ri 2-kursdan boshlab o‘qish imkoniga ega bo‘ladi. Bu eng avvalo, iqtidorli yoshlarni qo‘llab-quvvatlash va ularning salohiyatini amaliyotda ro‘yobga chiqarishga xizmat qiladi.
Yangicha maktablar va ularning roli
Prezident ta’kidlaganidek, iqtidorli o‘quvchilar uchun maxsus imkoniyatlar yaratish maqsadida qator filial maktablar tashkil etiladi. Jumladan:
-
axborot texnologiyalari sohasida – Al-Xorazmiy maktablari,
-
muhandislik yo‘nalishida – Mirzo Ulug‘bek maktablari,
-
tabiiy fanlarda – Ibn Sino maktablari.
Eng qizig‘i shundaki, bu maktablar hududlardagi texnika oliygohlariga nomma-nom biriktiriladi. Natijada o‘quvchilarning oliy ta’limga qadam qo‘yishi yanada tizimli va manzilli bo‘ladi.
Xalqaro olimpiadalar – O‘zbekistonda
Yangi yangiliklardan yana biri – 2026 yilda maktab o‘quvchilari o‘rtasidagi eng nufuzli ikkita xalqaro olimpiada – kimyo va informatika bo‘yicha bellashuvlar ilk bor Markaziy Osiyo davlatlari ichida, aynan O‘zbekistonda tashkil etiladi.
Poytaxt Toshkentda o‘tadigan mazkur olimpiadalarni yuqori saviyada o‘tkazish vazifasi Bosh vazir zimmasiga yuklatildi. Bu esa O‘zbekistonning xalqaro nufuzini oshirish bilan birga, mahalliy yoshlar uchun ham katta rag‘bat bo‘lishi kutilmoqda.
“Zamin”ni Telegramʻda oʻqing!
