Toshkent metropolitenida yo‘lovchilar uchun yana bir qulaylik yaratildi. Poytaxt metrosida zamonaviy infokioskalar ishga tushirilib, ular orqali endi yo‘lovchilar naqd pul evaziga qog‘oz chipta xarid qilishlari mumkin.
Hozirgi vaqtda 24 ta infokioska faoliyat boshlagan bo‘lib, ular har bir bekatning kirish qismida o‘rnatilmoqda. E’tiborli jihati shundaki, qurilmalar to‘lov vaqtida naqd pulni maydalamaydi — agar mablag‘ ortiqcha kiritilsa, qoldiq summa yo‘lovchining mobil telefon raqamiga o‘tkaziladi.
Loyiha tashkilotchilarining aytishicha, infokioskalar bosqichma-bosqich ko‘paytiriladi va yil yakuniga qadar ularning soni 200 taga yetkazilishi rejalashtirilgan. Shu tariqa, poytaxt metrosining barcha 50 ta bekati zamonaviy qurilmalar bilan jihozlanadi.
Kelgusida infokioskalarning imkoniyatlari yanada kengaytirilishi ko‘zda tutilgan. Ular orqali uy-joy kommunal xizmatlari va mobil aloqa uchun to‘lovlarni amalga oshirish, kartalardan mablag‘ yechish hamda boshqa turli interaktiv xizmatlardan foydalanish mumkin bo‘ladi.
Mazkur loyiha ATTO va Toshkent metropoliteni hamkorligida, yetakchi fintex kompaniyalardan biri — Alif tomonidan amalga oshirilmoqda. Mutaxassislar ta’kidlashicha, infokioskalar tizimni raqamlashtirish, yo‘lovchilarga tezkor xizmat ko‘rsatish va ularning vaqtini tejashda muhim qadam hisoblanadi.
Eslatib o‘tamiz, avvalroq metro kassalari qisqartirilishi bilan bog‘liq ravishda ayrim xodimlar qayta tayyorlanishi va yangi kasblarga yo‘naltirilishi haqida ma’lum qilingandi. Bu esa transport sohasida raqamli islohotlar tobora kengayib borayotganini ko‘rsatadi.
“Zamin”ni Telegramʻda oʻqing!
