O‘zbekistonda yo‘l harakati xavfsizligini ta’minlash va haydovchilarning haqli e’tirozlarini inobatga olish maqsadida muhim qonunchilik o‘zgarishi amalga oshirildi. Senat tomonidan ma’qullangan yangi qoidaga ko‘ra, endilikda radar va foto-videofiksatsiya qurilmalari yordamida qayd etilgan huquqbuzarliklar bo‘yicha jarimalar faqatgina 1 oy ichida qo‘llanishi mumkin bo‘ladi.
Avvalgi tartib o‘zgardi
Ma’lumki, avvalgi qonunchilikka ko‘ra, bunday jarimalarni belgillash muddati bir yilgacha cho‘zilishi mumkin edi. Bu esa ko‘plab haydovchilar orasida norozilik va turli muammolarni keltirib chiqarardi. Yangi qonun bilan bu tartib tubdan o‘zgardi va muddat bir oygacha qisqartirildi. Senatorlarning ta’kidlashicha, ushbu islohot haydovchilarning ishonchini mustahkamlashga xizmat qiladi.
Ogohlantirish tizimi joriy etildi
Shuningdek, yangi qonunchilikka ko‘ra, yo‘l harakati qoidalarining uncha jiddiy bo‘lmagan buzilishlari uchun haydovchilarga to‘g‘ridan to‘g‘ri jarima emas, balki ma’muriy ogohlantirish berish amaliyoti yo‘lga qo‘yiladi. Mutasaddilarning fikricha, bu chora nafaqat adolatni ta’minlaydi, balki haydovchilarning mas’uliyatini oshirishga ham turtki beradi.
Yangilikning ahamiyati
Mazkur qonunchilik o‘zgarishi haydovchilar uchun qulaylik yaratish, tizimda shaffoflik va ishonchni oshirishga qaratilgan. Shu bilan birga, yo‘llarda tartib va intizomni mustahkamlashda ham muhim ahamiyat kasb etadi.
“Zamin”ni Telegramʻda oʻqing!
