Bugun, 13-oktyabr kuni O‘zbekistonning bir qator hududlarida ob-havo keskin o‘zgarishi kutilmoqda. Bu haqda O‘zgidromet axborot xizmati ma’lum qildi.
Ma’lumotlarga ko‘ra, Qoraqalpog‘iston Respublikasi, Xorazm, Buxoro va Navoiy viloyatlarida shamolning tezligi soatiga 13–18 metrgacha yetishi mumkin. Ayrim joylarda shamol bilan birga chang‘-to‘zonlar kuzatilishi ehtimoldan xoli emas.
Mutaxassislar bunday ob-havo sharoiti nafaqat ko‘rish masofasini cheklaydi, balki nafas olish tizimiga ham salbiy ta’sir ko‘rsatishi mumkinligini ta’kidlamoqda. Shu bois aholiga ehtiyot choralarini ko‘rish, ortiqcha zaruratsiz ochiq havoga chiqmaslik va tashqariga chiqqan holda himoya niqoblaridan foydalanish tavsiya etiladi.
“Mazkur hududlarda yashovchi aholi hamda mehmonlardan ehtiyot bo‘lish so‘raladi. Imkon qadar ochiq havoda uzoq turmaslik, bolalar va keksalarni ham iloji boricha xona ichida ushlash kerak”, — deyiladi O‘zgidromet ma’lumotida.
Shuningdek, avtoyo‘llarda harakatlanishda ehtiyot bo‘lish, ayniqsa chang‘-to‘zon tufayli ko‘rish masofasi pasayganda tezlikni kamaytirish tavsiya qilindi.
Sinoptiklar ma’lumoticha, bugungi chang‘li havo asosan mamlakatning g‘arbiy va markaziy hududlariga xos bo‘lib, shamol oqimlari shimoldan janubga yo‘nalgan. Havo haroratida keskin o‘zgarish kutilmayapti, ammo havo sifatining pasayishi ehtimoli yuqori.
Mutaxassislar bunday ob-havo sharoiti 1–2 kun davom etishi mumkinligini bildirmoqda.
“Zamin”ni Telegramʻda oʻqing!
