O‘zbekistonda sog‘lom turmush tarziga qiziqish yil sayin ortayotgani yana bir bor tasdiqlandi. Milliy statistika qo‘mitasi ma’lumotlariga ko‘ra, 2025 yilning yanvar–avgust oylarida mamlakat aholisining jismoniy mashg‘ulotlar bilan shug‘ullanish darajasi sezilarli oshgan, deb xabar berdi idoraviy manbalar.
Ma’lumotlarga qaraganda, joriy yilda sport bilan shug‘ullanuvchi erkaklar ulushi 71,9 foizni tashkil etgan. Bu ko‘rsatkich 2024 yilga nisbatan 0,2 foizga yuqori. Ayollar o‘rtasida ham ijobiy dinamika kuzatilmoqda — ularning 64,1 foizi jismoniy mashg‘ulotlar bilan muntazam shug‘ullanishni odat qilgan.
Qo‘mita ma’lumotlari shuni ko‘rsatadiki, so‘nggi besh yil ichida faol aholi ulushi izchil o‘sib bormoqda.
Erkaklar kesimidagi statistika quyidagicha:
- 2021 yil — 66%
- 2022 yil — 67,3%
- 2023 yil — 68,8%
- 2024 yil — 71,7%
- 2025 yil — 71,9%
Ayollar orasidagi ko‘rsatkichlar ham barqaror o‘sishni namoyon etmoqda:
- 2021 yil — 55,7%
- 2022 yil — 57,3%
- 2023 yil — 58,5%
- 2024 yil — 63,7%
- 2025 yil — 64,1%
Mutasaddilarning fikricha, bu o‘sish nafaqat sog‘lom turmush tarzini targ‘ib qilish ishlari samarasi, balki hududlarda yangi sport infratuzilmalari barpo etilayotgani bilan ham bog‘liq. Oxirgi yillarda deyarli har bir tumanda sport maydonlari, fitnes markazlari va ochiq havodagi trenajyorlar soni ko‘paydi.
“Zamin”ni Telegramʻda oʻqing!
