Toshkentda va mamlakatning boshqa hududlarida uy-joy bozoridagi faollik ortib, narxlar yana o‘sish tendensiyasini ko‘rsatmoqda. Iqtisodiy tadqiqotlar va islohotlar markazi ma’lumoticha, 2025 yil sentyabr oyi yakuniga ko‘ra respublika bo‘ylab uy-joy oldi-sotdi shartnomalari soni 24,2 mingtani tashkil etdi — bu o‘tgan yilga nisbatan qariyb 14 foizga ko‘p.
Eng katta o‘sish Sirdaryo, Buxoro va Toshkent shahrida qayd etilgan. Uchinchi chorakda jami 75,5 mingta bitim rasmiylashtirilib, bu ham o‘tgan yilga nisbatan sezilarli o‘sishni ko‘rsatdi.
Ikkilamchi bozorda narxlar sentyabr oyida o‘rtacha 0,6 foizga ko‘tarilgan. Yillik hisobda bu ko‘rsatkich 4,6 foizni tashkil etdi. Eng tez qimmatlashgan hududlar — Surxondaryo, Sirdaryo va Jizzax. Shu bilan birga, Toshkentda ayrim tumanlarda narxlar biroz pasaygan — ayniqsa, Yashnobod va Chilonzorda 4 foiz atrofida.
Birlamchi bozorda esa aksincha, o‘sish qayd etilgan — o‘rtacha 3 foiz. Eng katta o‘sish Mirobod, Bektemir va Yakkasaroy tumanlarida kuzatilgan.
Ijara bozori ham shundan orqada qolmayapti: sentyabr oyida poytaxtda bir kvadrat metr uchun o‘rtacha ijara haqi 8,5 dollarga yetgan. Mirobod, Shayxontohur va Yakkasaroy tumanlari an’anaviy ravishda eng qimmat hududlar hisoblanadi.
O‘tgan yilga nisbatan ijara haqi o‘rtacha 1,4 foizga oshgan, ayrim tumanlarda — xususan, Yunusobod va Olmazorda — bu ko‘rsatkich 4,4 foizgacha yetib borgan.
Mutaxassislar fikricha, uy-joy bozoridagi bu tendensiya aholining investitsiyaga qiziqishi yuqori ekanini va ko‘chmas mulk sektori hali ham barqaror foyda manbai bo‘lib qolishayotganini ko‘rsatadi.
“Zamin”ni Telegramʻda oʻqing!
