O‘zbekistonda 5 may kuni endidan boshlab “Kasb va mehnat kuni” sifatida nishonlanadi.
Bu haqda davlat rahbarining “Kasbiy ta’lim tizimida islohotlarni amalga oshirish chora-tadbirlari to‘g‘risida”gi qarorida qayd etilgan. Hujjatga ko‘ra, yangi bayram doirasida yoshlar o‘rtasida kasblar nufuzini oshirish, mehnatga rag‘bat uyg‘otish va kasbiy ta’limni ommalashtirish bo‘yicha turli tadbirlar o‘tkaziladi.
Qarorda kasbiy ta’lim tizimini 2030 yilgacha rivojlantirish bo‘yicha bir qator muhim maqsadlar belgilandi. Xususan, xalqaro va qo‘shma ta’lim dasturlariga ega texnikumlar soni 250 taga yetkaziladi. Shu bilan birga, 9-sinf bitiruvchilarining kasbiy ta’lim bilan qamrovi amaldagi 29 foizdan 50 foizgacha oshiriladi.
Pedagoglar uchun ham katta imkoniyatlar yaratiladi — ularning xorijda malaka oshirish va stajirovka dasturlarida ishtirok etish soni 100 nafardan 2 500 nafargacha ko‘paytiriladi.
Shuningdek, maktabning 10-sinf o‘quvchilariga o‘z o‘qishini texnikumlarga ko‘chirish imkoni beriladi. Bu esa yoshlarga ertaroq amaliy kasb egallash imkonini yaratadi.
2026 yildan boshlab “Kasb va mehnat kuni” har yili keng nishonlanadi. Mutaxassislar fikricha, bu tashabbus yoshlar orasida kasb tanlashga qiziqishni kuchaytiradi va mehnatga bo‘lgan munosabatni yangi bosqichga olib chiqadi.
“Zamin”ni Telegramʻda oʻqing!
