Isitish mavsumida aholining ehtiyojmand qatlamiga moddiy yordam ko‘rsatish uchun 1,2 trillion so‘m ajratiladi, deb xabar berdi [Ijtimoiy himoya milliy agentligi].
Prezident qaroriga muvofiq, bu yil ijtimoiy qo‘llab-quvvatlash dasturiga 1,1 milliondan ziyod oila kiritildi. Ulardan 822 mingtasi avvaldan ijtimoiy reyestrda bo‘lgan, yana 290 mingga yaqini “Mahalla yettiligi” orqali qo‘shimcha aniqlangan.
Qo‘shimcha ro‘yxatga boquvchisini yo‘qotganlar, nogironligi bo‘lgan a’zosi bor oilalar, og‘ir kasallikka chalinganlar, yolg‘iz keksalar va gaz tarmog‘iga ulanmagan oilalar ham kiritilgan. Shuningdek, mehnat migratsiyasidagi boquvchisi bor yoki vaqtincha ishsiz shaxslar yashaydigan xonadonlar ham yordam oladi.
Ma’lumotlarga ko‘ra, o‘tgan yili 120 ming oilaga 270 ming so‘mdan moddiy yordam berilgan bo‘lsa, bu yil ajratiladigan mablag‘ miqdori 2,5 barobarga oshirilgan.
Dastur doirasida ajratiladigan 1,2 trillion so‘m davlat budjeti hisobidan qoplanadi. Mutaxassislar bu tashabbus isitish mavsumida ijtimoiy himoyaga muhtoj qatlamlar uchun katta yengillik yaratishini ta’kidlamoqda.
“Zamin”ni Telegramʻda oʻqing!
