O‘zbekistonda farmatsevtika bozoridagi narx siyosatini tubdan isloh qilish rejalashtirilmoqda, deb xabar berdi Gazeta.uz. Prezidentga taqdim etilgan yangi loyihaga ko‘ra, 2026 yil 1 yanvardan retsept asosida beriladigan 2600 turdagi dori vositalarining o‘rtacha narxi 40–50 foizgacha pasaytiriladi.
Hozir mamlakat bozorida 7600 nomdagi import dori vositalari mavjud bo‘lib, shularning qariyb 4900 tasi narx bo‘yicha xalqaro reyestrlarga kiritilmagan. Bu holat importchilarga narxni mustaqil belgilash imkonini berib, ba’zi hollarda dorilar qo‘shni davlatlardagidan ancha qimmat sotilishiga olib kelgan.
Yangi tizim “referent narxlar reyestri” orqali amalga oshiriladi. Unda Rossiya, Qozog‘iston va Yevropa Ittifoqi kabi davlatlarda tasdiqlangan rasmiy narxlar asos bo‘ladi. Shu orqali dori narxlari shaffof tarzda nazorat qilinadi va asossiz qimmatlashtirish holatlariga chek qo‘yiladi.
Bundan buyon dorixonalar va importchilar uchun erkin narx belgilash amaliyoti bekor qilinadi. Natijada aholi arzon va sifatli dori vositalariga kengroq kirish imkoniga ega bo‘ladi.
Ekspertlar ta’kidlashicha, tizimning samaradorligi nazorat organlarining faoliyatiga va ta’minotdagi barqarorlikka bog‘liq bo‘ladi. Yangi tartib orqali sun’iy narx oshirish, ortiqcha foyda olish va bozordagi noqulay vaziyatlar bartaraf etilishi kutilmoqda.
“Zamin”ni Telegramʻda oʻqing!
