O‘zbekistonda 2026 yil 1 yanvardan maishiy chiqindilarni olib chiqib ketish xizmatlari uchun to‘lovlar faqat onlayn shaklda amalga oshiriladi, deb xabar berdi Chiqindilarni boshqarish agentligi.
Yangi tartib jismoniy va yuridik shaxslarni qamrab oladi hamda mamlakat bo‘ylab sanitariya korxonalari orqali joriy etiladi.
Agentlik ma’lumoticha, islohot aholiga qulay to‘lov imkoniyatlarini yaratish, hisob-kitoblarda shaffoflikni ta’minlash va korrupsiya holatlariga chek qo‘yishni maqsad qiladi.
Endilikda chiqindi xizmatlari uchun to‘lovlar “Toza makon” billing tizimi yoki elektron to‘lov platformalari orqali amalga oshiriladi. Internet mavjud bo‘lmagan hududlarda esa tijorat banklari kassalari va “O‘zbekiston pochtasi” bo‘limlari orqali to‘lov qilish imkoni saqlanib qoladi.
Shuningdek, qarzdorlik mavjud bo‘lgan hollarda elektr energiyasi uchun to‘lovlarni qabul qilish vaqtincha to‘xtatilishi mumkinligi eslatib o‘tildi.
Mutasaddilarning ta’kidlashicha, tizim to‘liq ishga tushgach, chiqindilarni yig‘ish va to‘lovlar bo‘yicha barcha ma’lumotlar yagona onlayn baza orqali kuzatib boriladi.
“Zamin”ni Telegramʻda oʻqing!
