O‘zbekistonda maktabgacha ta’lim sohasida o‘sish qayd etilmoqda, deb xabar berdi Milliy statistika qo‘mitasi.
2024 yil yakuni bo‘yicha mamlakatda faoliyat yuritayotgan maktabgacha ta’lim muassasalari soni 38 058 taga yetdi. Bu 2023 yilga nisbatan 2 mingdan ziyod ko‘rsatkich bo‘lib, tizimdagi kengayish sur’ati ortib borayotganini ko‘rsatadi.
Ma’lumotlarga ko‘ra, bog‘chalarning asosiy qismini — 28 700 dan ortig‘ini oilaviy nodavlat muassasalar tashkil etadi. So‘nggi yillarda xususiy sektorni qo‘llab-quvvatlash va litsenziyalash jarayonlarining soddalashuvi bu yo‘nalishda faol rivojlanishga turtki bo‘ldi.
Eng ko‘p bog‘chalar Samarqand (4 507 ta), Andijon (4 324 ta), Qashqadaryo (4 216 ta) va Farg‘ona (4 189 ta) viloyatlariga to‘g‘ri kelmoqda. Toshkent shahri (1 047 ta) va Sirdaryo viloyati (1 145 ta) esa eng past ko‘rsatkichga ega hududlar sifatida qayd etilgan.
Mutaxassislar ta’kidlashicha, bog‘chalar sonining ortishi bolalarning erta rivojlanishi va ta’lim sifatiga ijobiy ta’sir ko‘rsatmoqda. Shu bilan birga, tarbiyachilar malakasini oshirish va sifat nazoratini kuchaytirish hanuz muhim vazifa bo‘lib qolmoqda.
“Zamin”ni Telegramʻda oʻqing!
