Toshkentda havo sifati bo‘yicha xavotirlar ortib borar ekan, rasmiylar ifloslanishning asosiy manbalaridan biri — avtotransport ekanini yana bir bor ta’kidladi. Ekologiya va iqlim o‘zgarishi milliy qo‘mitasi rahbari Aziz Abduhakimovning ma’lumotiga ko‘ra, ayniqsa AI-80 benzinining zarari katta bo‘lgani sabab, uning mamlakat bo‘ylab sotilishi ham, olib kirilishi ham 1 dekabrdan butunlay to‘xtatiladi, deb xabar berdi qumita.uz.
Uning aytishicha, yillar davomida arzonligi uchun keng ishlatilgan AI-80 poytaxt havosining bulg‘inishida jiddiy rol o‘ynagan. Shu bois, ushbu qaror Toshkentdagi ekologik vaziyatni yengillashtirishga xizmat qilishi kutilayapti.
Yig‘ilishda poytaxtda mashinalar soni keskin oshgani ham ma’lum qilindi. Hozir Toshkent ko‘chalarida kuniga bir millionga yaqin transport vositasi harakatlanadi. Shundan 650 mingtasi shahrining o‘zida ro‘yxatda tursa, kuniga 300–350 mingta avtomobil viloyatlardan kirib keladi. Besh yil avval bu raqam deyarli ikki baravar kam edi.
Abduhakimov qo‘shimcha qilishicha, transport oqimini tartibga solish uchun joriy etilgan yashil-sariq-qizil stiker tizimi ham o‘z samarasini berishi mumkin. Uning fikricha, boshqa davlatlar tajribasida ham shu usul orqali eski va atrof-muhitga zarar yetkazuvchi mashinalar asta-sekin muomaladan chiqarilgan.
Mas’ullar fikricha, yangi tartib va cheklovlar havo sifatini yaxshilashga qaratilgan eng muhim qadamlardan biri bo‘ladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
