Prezident Shavkat Mirziyoyev mamlakatda yuqori malakali kadrlar tayyorlashni yangi bosqichga olib chiqishga qaratilgan muhim hujjat — «O‘zbek–Fransuz universitetini tashkil etish chora-tadbirlari to‘g‘risida»gi qarorni imzoladi. Mazkur qaror O‘zbekiston va Fransiya o‘rtasidagi ta’lim sohasidagi hamkorlikni yanada mustahkamlash, zamonaviy ta’lim standartlarini joriy etish va yoshlar uchun xalqaro mezonlarga javob beruvchi imkoniyatlar yaratishni maqsad qiladi.
Qarorga muvofiq, O‘zbek–Fransuz universiteti tashkil etiladi va u o‘z faoliyatini mamlakat qonunchiligi hamda Fransiya universitetlari konsorsiumi tomonidan ishlab chiqilgan tavsiyalar asosida yo‘lga qo‘yadi. Bu esa universitet ta’lim tizimi jahon andozalariga mos ravishda shakllantirilishini ta’minlaydi.
Mazkur oliygohda dastlab magistratura yo‘nalishlarida o‘quv jarayoni boshlanadi. Keyinchalik talab yuqori bo‘lgan sohalar bo‘yicha bosqichma-bosqich bakalavriat va doktorantura dasturlari ham ochilishi rejalashtirilgan. Shu bilan birga, abituriyentlar uchun maxsus tayyorlov kurslari joriy qilinib, ularni qabul jarayoniga puxta tayyorlashga e’tibor qaratilmoqda.
Ta’lim jarayoni maqsadli davlat grantlari va to‘lov-kontrakt asosida amalga oshiriladi. Eng muhim jihatlardan biri — bitiruvchilarga ikki xil imkoniyat taqdim etiladi: ularga o‘z universiteti diplomi bilan bir qatorda konsorsiumga kirgan Fransiya universitetlaridan birining akkreditatsiyadan o‘tgan ta’lim dasturi bo‘yicha diplomi ham berilishi mumkin. Ya’ni, bitiruvchi ikki davlat standartlariga mos, xalqaro yetuk darajadagi hujjatga ega bo‘ladi.
Ushbu diplomlar O‘zbekiston hududida to‘liq tan olinadi. Bu esa talabalar uchun faqat davlat ichida emas, balki xorijda ham ish, ilmiy faoliyat va o‘qish imkoniyatlarini kengaytirib beradi.
Yangi universitetning tashkil etilishi mamlakat oliy ta’lim tizimida yana bir muhim qadam bo‘lib, yoshlarga xalqaro hamkorlik asosida mukammal bilim, zamonaviy yondashuv va amaliyotga yaqinlashgan ta’lim muhitini taqdim etadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
