O‘zbekistonda aliment to‘lovchilar uchun muhim yangilik qabul qilindi — endi ular sug‘urta polisi orqali uch oygacha chet elga chiqishi mumkin. Bu Prezidentga bog‘liq qaror emas, balki Bosh prokuratura, IIV va DXXning qo‘shma qarori bilan amaldagi nizomga kiritilgan o‘zgarishdir.
Yangi tartibga ko‘ra, aliment majburiyati bo‘lgan shaxs sug‘urta polisini ilova qilgan holda davlat ijrochisiga murojaat etsa, uning xorijga chiqishiga qo‘yilgan vaqtinchalik cheklov to‘xtatib turiladi. Polis faqat litsenziyaga ega sug‘urtalovchilar tomonidan beriladi va uning haqiqiyligi MIB axborot tizimi orqali avtomatik tekshiriladi.
Sug‘urta mexanizmidan maqsad — qarzdor chet elga chiqib, qaytmay qolsa ham, aliment to‘lovlari to‘liq qoplanishiga kafolat yaratish. Fuqarolik javobgarligini sug‘urtalash shartlari sug‘urtalovchi va MIB o‘rtasidagi bosh kelishuvda belgilanadi.
26 noyabrdan kuchga kirgan ushbu qoidaga qadar cheklovni vaqtincha olish faqat ikki holatda mumkin edi:
— davolanish uchun xorijga chiqish zarur bo‘lganda;
— Prezident, Vazirlar Mahkamasi yoki parlament qaroriga binoan rasmiy delegatsiya tarkibiga kiritilganda.
Mehmon guruhidagi foydalanuvchilar ushbu nashrga izoh qoldira olmaydi.
