Payme ilovasi kartalar orasidagi P2P o‘tkazmalar uchun komissiya miqdorini yashirin ravishda oshirib, foydalanuvchilar orasida katta muhokamalarni keltirib chiqardi. Ilgarigi 1 foiz o‘rniga endi 1,1 foiz yechilayotgani aniq bo‘ldi. Qizig‘i shundaki, payme.uz saytida hamon eski — 1 foizlik tarif yozib turibdi.
Zamin.uz muxbiri masalaga oydinlik kiritish uchun Payme qo‘llab-quvvatlash xizmatidan ma’lumot oldi. O‘zini Karina deb tanishtirgan operator komissiya haqiqatan ham 4 dekabrdan oshganini tasdiqladi. Uning ta’kidiga ko‘ra, bu o‘zgarish ilovani yanada takomillashtirish maqsadida amalga oshirilgan.
Biroq eng qiziq nuqta — foydalanuvchilarga bu haqda hech qanday xabar berilmagani. Operator buni ofera shartlari bilan izohlab, komissiya to‘g‘risidagi ma’lumot faqat tranzaksiya vaqtida ko‘rsatilishini qayd etdi.
Shu bilan birga, ayrim Telegram kanallari Payme xodimlari bilan muloqotda komissiya miqdori aslida ikki oy avvalyoq oshirilganini bildirgan. Bu esa vaziyatga yanada ko‘proq savollarni qo‘shmoqda.
Payme tomonidan rasmiy tushuntirish berilmaguncha, foydalanuvchilar o‘rtasidagi norozilik va muhokamalar davom etmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
