Prezident Shavkat Mirziyoev Oliy Majlis va xalqga murojaatida transport infratuzilmasini tubdan yangilashga qaratilgan besh yillik katta dastur start olishini ma’lum qildi. Asosiy maqsad — mamlakatning tranzit salohiyatini oshirish va iqtisodiy o‘sishga kuchli turtki berish. Bu haqda upl.uz xabar beradi.
Davlat rahbari BMT tahlillariga tayanib, sifatli yo‘llar YAIMga bevosita ta’sir ko‘rsatishini, iqtisod kamida 2% o‘sishini ta’kidladi. Shu bois respublikaning eng muhim yo‘l arteriyalari maqomi qayta ko‘rib chiqilib, umumiy 4 ming kilometr magistral zamonaviy, xalqaro talabga mos “avtoban”larga aylantiriladi.
Yangilanish mamlakat hududlarini bog‘laydigan strategik yo‘nalishlardan boshlanadi. Ustuvor ro‘yxatda Andijon–Qo‘ng‘irot hamda Toshkent–Termiz trassalari bor, shuningdek Samarqand–Shahrisabz va Alat–Sariosiyo yo‘llari ham modernizatsiyadan o‘tadi.
Mavjud yo‘llarni rekonstruksiya qilish bilan birga, mutlaqo yangi infratuzilma ham quriladi — 800 kilometr yuqori tezlikka mo‘ljallangan pullik yo‘llar barpo etilishi ko‘zda tutilgan. Loyiha poytaxtni yirik hududiy markazlar va turistik yo‘nalishlar bilan bog‘laydi: Toshkent–Samarqand, Toshkent–Andijon va Toshkent–Bo‘stonliq yo‘nalishlarida pullik uchastkalar paydo bo‘ladi, shuningdek Pungan–Namangan hamda Qarshi–Shahrisabz kesimlarida ham ishlar olib boriladi.
2026 yilgi rejalarga ko‘ra, yana 300 kilometr umumiy foydalanishdagi yo‘llar qayta ta’mirlanadi. Texnika Qoraqalpog‘iston Respublikasi, Buxoro, Qashqadaryo va Surxondaryo viloyatlaridagi eng dolzarb uchastkalarga kirib boradi.
Mirziyoev shahar va shaharlararo muhitni rejalashtirishga yondashuv ham o‘zgarishini alohida qayd etdi. Endi qonunchilik darajasida loyihachilar aholi fikrini inobatga olishga majbur bo‘ladi, transport oqimining ekologiyaga ta’siri baholanadi va piyodalar uchun qulay “to‘siqsiz” muhit yaratish talab etiladi.
Ma’lumot uchun, dunyodagi eng uzun avtomobil yo‘li — qariyb 30 ming kilometrli Panamerika shossesi. Biroq O‘zbekiston iqlimida qishda -20, yozda +50 darajagacha keskin o‘zgaradigan haroratlar sabab uzoq xizmat qiladigan avtobanlar qurish uchun asfaltning quyoshda yumshab ketishini oldini oladigan maxsus polimer-bitum bog‘lovchi materiallardan foydalanish zarurligi ta’kidlandi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
