2026 yildan boshlab mahallalar hayotida yangi va muhim tizim joriy etiladi. Mamlakatda «Eng yaxshi soliq to‘lovchi mahalla» nominatsiyasi ishga tushirilib, mahalliy darajada iqtisodiy faollikni oshirish va hududlarni yanada obod qilishga qaratilgan qo‘shimcha imkoniyatlar yaratiladi.
Yangi tartibga ko‘ra, har yili ushbu reytingda eng yuqori ko‘rsatkich qayd etgan top-100 ta mahalla Davlat byudjetidan har biri uchun 2 milliard so‘mdan moliyaviy qo‘llab-quvvatlanadi. Bu mablag‘lar mahallaning iqtisodiy faolligi va soliq intizomiga qarab taqsimlanadi.
Ajratiladigan mablag‘lardan qanday foydalanish masalasi fuqarolar yig‘ini kengashi qarori asosida belgilanadi. Xususan, ushbu resurslar ichki yo‘llarni ta’mirlash, elektr ta’minotini yaxshilash, yoritish tizimlarini yangilash, muhandislik tarmoqlarini tiklash hamda mahalla infratuzilmasini kompleks rivojlantirishga yo‘naltiriladi.
Mutaxassislar fikricha, bu tashabbus mahallalar o‘rtasida sog‘lom raqobatni kuchaytirib, soliq to‘lash madaniyatini oshirish bilan birga, aholining turmush sharoitini yaxshilashga ham xizmat qiladi. Chunki mahallaning iqtisodiy faolligi to‘g‘ridan to‘g‘ri uning obodligi va aholi farovonligida aks etadi.
Qisqacha aytganda, «Eng yaxshi soliq to‘lovchi mahalla» nominatsiyasi mahallalarni rivojlantirish, joylarda infratuzilmani yaxshilash va fuqarolar tashabbusini qo‘llab-quvvatlash yo‘lida yana bir muhim qadam sifatida baholanmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
