Statistika agentligi keltirgan ma’lumotlarga ko‘ra, 2025 yilda mamlakat bo‘yicha 177 104 nafar fuqaroning vafoti qayd etilgan. Bu ko‘rsatkich 2024 yilga nisbatan 2 700 taga ko‘p.
Qayd etilishicha, vafot etganlarning 55,1 foizi erkaklar (97,5 ming), 44,9 foizi ayollar (81,4 ming) hissasiga to‘g‘ri keladi. O‘lim holatlarining 54,1 foizi shahar aholisi, 45,9 foizi qishloq aholisi orasida qayd etilgan.
Tahlillarda esa asosiy sabab o‘zgarmagan: qon aylanish tizimi, ya’ni yurak-qon tomir kasalliklari hali ham birinchi o‘rinda. 2025 yilda aynan shu kasalliklar oqibatida 104 mingdan ortiq kishi hayotdan ko‘z yumgan. Keyingi o‘rinlarda neoplazmalar, nafas olish yo‘llari va boshqa kasalliklar qayd etilgan.
Hududlar kesimida eng yuqori ko‘rsatkichlar Samarqand viloyati (19 670), Farg‘ona viloyati (18 695) va Toshkent viloyati (16 984) hissasiga to‘g‘ri kelgan. Toshkent shahrida esa yil davomida 16 926 nafar fuqaro vafot etgan. Eng past ko‘rsatkichlar Sirdaryo viloyati (4 624) va Navoiy viloyati (4 781)da qayd etilgan.
Shu bilan birga, mamlakatda o‘rtacha umr ko‘rish davomiyligi oshishda davom etyapti: 1991 yilda 66,4 yosh bo‘lgan ko‘rsatkich 2024 yilga kelib 75,1 yoshga yetgan. 2030 yilga borib o‘rtacha umr ko‘rishni 78 yoshga yetkazish maqsad qilingani aytilmoqda.
Qisqasi, raqamlar og‘ir, lekin xulosa aniq: profilaktika, o‘z vaqtida tekshiruv va sog‘lom turmush tarzi — “ertaga” uchun eng qattiq investitsiya. Hayot statistika emas, har bir raqam ortida inson bor.
“Zamin”ni Telegramʻda oʻqing!
