Andijon viloyatida qo‘shnisining uyiga kirib, voyaga yetmagan bolaga zo‘rlik ishlatgan holda 7 dona jo‘jani bosqinchilik yo‘li bilan olib ketgan 39 yoshli erkak 10 yil 2 oy muddatga ozodlikdan mahrum etildi.
Hujjatlarda qayd etilishicha, voqea 2025 yil 3 may kuni soat 13:30 larda Andijon viloyatining Baliqchi tumanida sodir bo‘lgan. Ayblanuvchi mahalladoshining xonadoniga o‘g‘rilik niyatida kirgan. Hovlida xonadon egasining voyaga yetmagan o‘g‘li ko‘rinib qolganidan so‘ng, unga hujum qilgani aytilmoqda: bolaga zo‘rlik ishlatib, urib-do‘pposlagan, bo‘g‘ish orqali og‘ir tan jarohati yetkazgan.
Shundan keyin u hovlidagi katakdan 7 dona jo‘jani bosqinchilik yo‘li bilan olib, voqea joyidan qochib ketgani ko‘rsatilgan.
Ma’lum bo‘lishicha, mazkur shaxs avval ham turli jinoyatlar uchun 7 marta sudlanib, jazo muddatlarini o‘tab chiqqan.
Jinoyat ishlari bo‘yicha Oltinko‘l tuman sudining 2025 yil 11 noyabrdagi hukmiga ko‘ra, u Jinoyat kodeksining 164-moddasi 3-qismi “a, v, g” bandlari bo‘yicha aybli deb topilib, 10 yilga ozodlikdan mahrum qilingan. 60- va 61-moddalar qo‘llanilib, yakuniy jazo 10 yil 2 oy etib belgilangan. Shuningdek, u “o‘ta xavfli retsidivist” deb topilib, jazoni maxsus tartibli koloniyada o‘tashi belgilangan.
Ayblanuvchi aybini tan olgan, biroq “o‘ta xavfli retsidivist” degan bahoga rozi bo‘lmay, apellyatsiya shikoyati kiritgan.
Joriy yil 28 yanvar kuni Andijon viloyati sudida apellyatsiya instansiyasida ish qayta ko‘rilgan. Sud hay’ati birinchi instansiya tomonidan 164-modda 3-qism “a” bandi (takroranlik) noto‘g‘ri qo‘llanilgan, degan xulosaga kelgan: ayblanuvchi avval aynan shu modda yoki unga o‘xshash jinoyat uchun sudlanmagani sabab takroriylik belgisi yo‘q, deb baholangan.
Shu asosda mazkur “a” bandi ayblovdan chiqarilgan. Ammo jazo turi va muddati adolatli, deya topilib, 10 yil 2 oy ozodlikdan mahrum qilish o‘zgartirishsiz qoldirilgan. Qolgan qismlar, jumladan jazoni ijro etish tartibi ham saqlab qolingan, apellyatsiya shikoyati esa qisman qanoatlantirilgan.
“Zamin”ni Telegramʻda oʻqing!
