O‘zbekistonda dam olish kunlari havo “iliqlik rejimi”dan sekin-asta chiqib, salqinroq tomonga burilishi kutilmoqda. “O‘zgidromet” ma’lumotlariga ko‘ra, 20 fevral kuni hali katta hududlarda quruq va juda iliq ob-havo saqlanib turadi, ammo 21 fevral atrofida nam va salqin havo oqimi kirib kelishi prognoz qilingan.
20 fevral, juma kuni respublika hududining asosiy qismida yog‘ingarchilik kuzatilmaydi. Kun o‘rtasida havo harorati 20–25 daraja iliqqacha ko‘tarilishi kutilmoqda. Bu ko‘rsatkich qishning oxirgi oyiga emas, ko‘proq bahorning o‘rtalariga xos. Faqat Qoraqalpog‘iston Respublikasi va Xorazm viloyatida, shuningdek, kechqurun yaqin Buxoro hamda Navoiy viloyatlarining ayrim joylarida yomg‘ir yog‘ishi mumkin. Respublika shimolida esa harorat 8–13 daraja atrofida bo‘ladi.
21 fevral, shanba kuni Turkmaniston tomondan nam va salqin havo massalari kirib kelishi aytilmoqda. Shu kuni kechasi va ertalab Qoraqalpog‘iston hamda Xorazmdan tashqari ko‘pchilik hududlarda yomg‘ir yog‘ishi, ayrim joylarda momaqaldiroq kuzatilishi mumkin. Farg‘ona vodiysida esa yomg‘ir asosan ertalab va kunning birinchi yarmida kutilmoqda.
Tog‘oldi va tog‘li hududlarda 21 fevral kuni yog‘ingarchilik (yomg‘ir, qor) bo‘lishi, ba’zi nuqtalarda kuchayishi ehtimoli bor. Shu sabab sel-suv toshqin holatlari yuzaga kelishi mumkin. Shamol tezligi 7–12 m/s atrofida bo‘ladi, ayrim joylarda 13–18 m/s gacha, ba’zan 20–25 m/s gacha kuchayishi ham ehtimoldan xoli emas.
21 fevral kuni kunduzi harorat me’yoriy qiymatlarga qadar pasayib, 9–14 daraja iliq atrofida bo‘lishi kutilmoqda. 22 fevral, yakshanba kuni esa respublika bo‘yicha yog‘ingarchilik kutilmaydi, harorat yana 15–18 daraja iliqqacha ko‘tarilishi prognoz qilingan.
Dam olish kunlari kechasi va ertalab ayrim joylarda tuman tushishi mumkin.
Toshkent shahrida 20 fevral kuni harorat 22–24 daraja iliq bo‘ladi. 21 fevral kechasi va ertalab yomg‘ir yog‘ishi, momaqaldiroq bo‘lishi mumkin, kunduzi esa yog‘ingarchilik kutilmaydi. Harorat 11–13 daraja iliq atrofida saqlanadi. 22 fevral kuni yog‘ingarchilik prognoz qilinmagan, kechasi va ertalab tuman tushishi mumkin. Harorat kechasi 3–5, kunduzi 14–16 daraja iliq bo‘ladi.
“Zamin”ni Telegramʻda oʻqing!
