So‘nggi yillarda qurilish va kadastr sohasida islohotlar jadal bormoqda, biroq hali ham aholi orasida hujjatlari chala yoki rasmiylashtirilmagan ko‘chmas mulk obyektlari talaygina. Shu bois, fuqarolarga meros masalasida qulaylik yaratish maqsadida yangi qonun loyihasi ishlab chiqildi.
Hujjati yo‘q imoratlar ham meros tarkibiga kiradi
Eng katta yangiliklardan biri shundaki, endilikda marhumga tegishli bo‘lgan, ammo undagi bino va inshootlarga bo‘lgan huquqlar davlat ro‘yxatidan o‘tkazilmagan yer uchastkalari ham meros tarkibiga kiritilishi mumkin. Ilgari bunday holatlar ko‘p sonli sud mashmashalariga sabab bo‘lar edi.
Yangi tartibga ko‘ra, yer uchastkasiga bo‘lgan huquqning yangi egasiga o‘tishi notarial tasdiqlangan guvohnoma asosida Ko‘chmas mulk obyektlari davlat reestriga kiritiladi. Bu esa merosxo‘rlar uchun ortiqcha ovoragarchiliklarga chek qo‘yadi.
Marhum nomiga huquqni ro‘yxatdan o‘tkazish imkoniyati
Loyihada “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi qonunga ham muhim qo‘shimchalar kiritilmoqda:
- Qurilishi tugallangan binolar: Marhumning yaqin qarindoshlari arizasiga binoan, imoratlar dastlab marhum nomiga davlat ro‘yxatidan o‘tkazilishi mumkin.
- Tugallanmagan obyektlar: Xuddi shunday tartib hali qurib bitkazilmagan inshootlarga nisbatan ham joriy etilishi taklif qilinmoqda.
Bu mexanizm merosxo‘rlarga mulkni qonuniy egasidan (marhumdan) o‘z nomlariga to‘g‘ridan to‘g‘ri va tizimli o‘tkazish imkonini beradi.
Xususiylashtirilgan yerlar muhofazasi
Shuningdek, xususiy mulk sifatida sotib olingan, hadya qilingan yoki meros qolgan yer uchastkalari bo‘yicha ham mulkdor haqidagi ma’lumotlar davlat reestrida qat’iy aks ettiriladi. Bu esa yer egalarining huquqlarini davlat tomonidan himoya qilishni yanada kuchaytiradi.
Ushbu islohotlar aholining yillar davomida to‘planib qolgan muammolarini hal qilish, ko‘chmas mulk bozorini shaffoflashtirish va fuqarolarning mulkiy huquqlarini kafolatlashga xizmat qiladi.
Sizningcha, ushbu yangilik meros rasmiylashtirishdagi korrupsiya va ovoragarchiliklarni to‘liq bartaraf eta oladimi?
“Zamin”ni Telegramʻda oʻqing!
