Joriy yildan yoshlar uchun yangi imkoniyat eshiklari ochilyapti: “Kelajak tadbirkori” dasturi ishga tushirilib, yosh tadbirkorlarga 7-yil muddatgacha 15 foizli moliyalashtirish ajratish boshlanadi. Shuningdek, oliygoh bitiruvchilari uchun “Mening birinchi kasbim” stajirovka dasturi va hududlarda “Yoshlar biznes inkubatori” markazlarini tashkil etish rejalashtirildi.
15 foizli kreditlar kimlarga, qancha?
Ma’lum qilinishicha, “Kelajak tadbirkori” doirasida yoshlar uchun kreditlar yo‘nalishga qarab bosqichma-bosqich beriladi:
- o‘zini o‘zi band qilgan yoshlarga garovsiz 20 million so‘mgacha kredit;
- tadbirkorlik ko‘nikmasiga ega bo‘lib, yangi biznes boshlayotganlarga 300 million so‘mgacha;
- ishini kengaytirmoqchi bo‘lgan yosh tadbirkorlarga 2 milliard so‘mgacha;
- kamida 5 nafar bitiruvchini ishga olgan tadbirkorlarga 10 milliard so‘mgacha kredit ajratish ko‘zda tutilgan.
“Mening birinchi kasbim” stajirovka dasturi
Yoshlarning mehnat bozoriga “qo‘rqmasdan” kirib borishi uchun Oliy ta’lim, fan va innovatsiyalar vazirligi bilan hamkorlikda “Mening birinchi kasbim” dasturini ishga tushirish topshirildi. Unga ko‘ra, stajirovka asosida oliygoh bitiruvchilari o‘rtasida tanlov o‘tkaziladi. G‘oliblarga oyiga 2 million so‘mgacha stipendiya to‘lab berish amaliyoti yo‘lga qo‘yiladi.
Nega biznes inkubator kerak bo‘lyapti?
Uchrashuvda muhim muammo ochiq aytildi: tadbirkorlikni endi boshlayotgan yoshlarning taxminan 30 foizi biznes ko‘nikmasi yetishmasligi sababli qiyinchilikka uchrayotgani qayd etildi. Ya’ni pul bor, g‘oya bor, lekin “qanday qilib” qismida to‘siq ko‘p.
Shu bois har bir hududda “Yoshlar biznes inkubatori” ishga tushirilishi belgilandi. Bu markazlar yoshlarga:
- tadbirkorlikka o‘qitish,
- g‘oyani biznesga aylantirish,
- buxgalteriya va bank masalalari,
- marketing,
- ichki va tashqi bozorga chiqish
kabi yo‘nalishlarda kompleks xizmat ko‘rsatadi.
Qaysi hududlarda birinchi bo‘lib ochiladi?
Mutasaddilarga yoshlar uchun qulay joylarni belgilash va markazlarni bosqichma-bosqich ochish vazifasi qo‘yildi. Bu yil Qoraqalpog‘iston, Jizzax, Namangan, Surxondaryo, Xorazm va Toshkent shahrida, kelgusi yil esa qolgan hududlarda shunday inkubatorlar tashkil etilishi rejalashtirilgan.
Xulosa shu: endi yoshlar “pul topish qiyin” deb to‘xtab qolmasligi kerak — kredit, stajirovka va inkubator uchligi bilan yo‘l ancha ochiq. Eng muhimi, imkoniyatni “foydalandim” degan natijaga aylantirish — aynan o‘z qo‘limizda.
“Zamin”ni Telegramʻda oʻqing!
