Yangi o'quv yilidan boshlab O'zbekistonda xotin qizlarning ta'lim olishi va ilmiy izlanishlarini rag'batlantirish maqsadida qator imtiyozlar joriy etilmoqda. Xususan, ehtiyojmand oilalardagi xotin qizlar uchun ajratiladigan davlat granti kvotasi ikki barobarga oshirilib, 4 mingta etib belgilandi. Bu o'zgarish minglab yoshlarning oliy ta'lim olish imkoniyatini kengaytiradi.
Shuningdek, nufuzli xalqaro reytingdagi top 300 talik oliygohlar bilan hamkorlikda magistratura bosqichida o'qiyotgan qizlarning kontrakt to'lovlari davlat tomonidan qoplab beriladi. Bu qadam iqtidorli yoshlarning xalqaro standartlar asosida bilim olishiga katta turtki bo'ladi.
Bundan tashqari, maktabni bitirib, davlat texnikumlariga o'qishga kirgan qizlarning kasb egallashi to'liq davlat granti asosida amalga oshiriladi. Bu orqali yoshlarning mehnat bozorida o'z o'rnini topishi va malakali mutaxassis bo'lib yetishishi ko'zda tutilgan.
Xotin qizlarning innovatsion g'oyalarini qo'llab quvvatlash uchun esa har yili kamida 10 ta yo'nalish bo'yicha startap tanlovlari o'tkaziladi. Har bir yo'nalish g'olibiga Innovatsiya jamg'armasi tomonidan 500 million so'mgacha grant mablag'lari ajratilishi belgilab qo'yildi.
“Zamin”ni Telegramʻda oʻqing!
