Fuqarolar oʻrtasida koʻp savol tugʻdirayotgan masala — koʻchada tekshiruv jarayoniga aniqlik kiritildi. IIV Jamoat xavfsizligi departamenti huquqni muhofaza qiluvchi organlar xodimlarining tekshiruv vakolatlari boʻyicha rasmiy tushuntirish berdi.
Maʼlum qilinishicha, tekshiruv jarayonida eng muhim farq — koʻzdan kechirish va tintuv oʻrtasidagi huquqiy chegaralarda namoyon boʻladi.
Koʻzdan kechirish: faqat vizual nazorat
Bu holatda xodim faqat tashqi koʻrinishni baholaydi. Yaʼni inson, uning buyumlari yoki avtomobil faqat yuzaki tarzda koʻzdan kechiriladi.
Muhimi:
— Xodim buyumlarga tegishga haqli emas;
— Choʻntaklarni boʻshatishni talab qilishi mumkin emas;
— Xolislar va bayonnoma talab qilinmaydi.
Biroq xodim oʻzini tanishtirishi va lavozimini aytishi shart.
Qoʻshimcha tekshiruv: asos boʻlsa — qoidalar qatʼiy
Agar huquqbuzarlikka gumon paydo boʻlsa, tekshiruv kengaytirilishi mumkin. Bu holatda sumka, choʻntak yoki transport salonidagi narsalar tekshiriladi.
Bu jarayonda:
— Kamida ikki nafar xolis ishtirok etishi shart;
— Albatta bayonnoma rasmiylashtiriladi;
— Shaxsiy tintuv faqat bir xil jinsdagi xodim tomonidan oʻtkaziladi.
Fuqarolar esa bu jarayonda sabablarni tushuntirishni va qonun talablariga toʻliq rioya etilishini talab qilish huquqiga ega.
Hujjat tekshiruvi va javobgarlik
Departament maʼlumotiga koʻra, PPX xodimlari shaxsni aniqlash maqsadida hujjatlarni tekshirish huquqiga ega. Bu qonuniy talab hisoblanadi.
Agar fuqaro qonuniy talablarga boʻysunmasa yoki qarshilik koʻrsatsa, bu holat maʼmuriy javobgarlikka olib kelishi mumkin.
Yakuniy xulosa
Qisqasi, farq juda oddiy:
— Koʻzdan kechirish — yuzaki qarash.
— Tintuv — qonuniy tartibdagi toʻliq tekshiruv.
Eng muhimi, har ikki holatda ham fuqarolar oʻz huquqlarini bilishi va qonuniy tartibda harakat qilishi kerak. Chunki qonunni bilgan odamni aldash qiyin.
“Zamin”ni Telegramʻda oʻqing!
